اسلام آباد ۔ 28 اگست (اے پی پی)اجوکے مالی سال جولائی 2020ءدے دوران پاکستان اچ کیتی ونجنڑ آلی براہ راست غیر ملکی سرمایہ کاری (ایف ڈی آئی) اچ 61 فیصد ودھارا تھئے ۔ سٹیٹ بینک آف پاکستان (ایس بی پی) دی رپورٹ موجب اجوکے مالی سال اچ جولائی جولائی 2020ءدے دوران ملک اچ 114.3 ملین ڈالر دی براہ راست غیر ملکی سرمایہ کاری کیتی گئی جڈاں جو جولائی 2019ءاچ ایف ڈی آئی دا حجم 71.1 ملین ڈالر رہیا ہئی ۔ اینویں جولائی 2019ءدے مقابلے اچ جولائی 2020ءدے دوران ملک اچ کیتی ونجنڑ آلی ایف ڈی آئی دی شرح اچ 43.2 ملین ڈالر یعنی 61 فیصد دا نمایاں ودھارا ریکارڈ کیتا گئے۔ ایس بی پی موجب جولائی 2020ءدے دوران چین ولوں ساریں توں ودھ 27 ملین ڈالر دی سرمایہ کاری کیتی گئی اے جڈاں جو مالٹا دے سرمایہ کاراں 18.5 ملین ڈالر اتے ہالینڈ 18.2 ملین ڈالر دی براہ راست غیر ملکی سرمایہ کاری کیتی اے ۔
