مظفرگڑھ دی تحصیل علی پور اچ ھیڈ پنجند تے وچلے درجے دا سیلاب متوقع

مظفرگڑھ ۔ 3 ستمبر (اے پی پی) مظفرگڑھ دی تحصیل علی پور اچ ھیڈ پنجند دی جاہ تے وچلے درجے دا سیلاب متوقع ، اسسٹنٹ کمشنر علی پور مبین احسن سیلابی صورتحال انتظامات دا جائزہ گھننڑ کیتے ہیڈ پنجند دا دورہ کیتا ۔ایس ڈی او ہیڈ پنجند چوہدری خالد محمود انھاں کوں دریائے چناب اچ سیلابی صورتحال بارے بریفنگ ڈتی اسسٹنٹ کمشنر مبین احسن ایں موقع تے میڈیا کوں سیلاب نال نبڑنڑ سانگے کیتے گئے اقدامات دی تفصیل ڈسیندے ہوئیں آکھیے جو ہیڈ پنجند تے دریائے چناب اچ تلویں توں درمیانے درجے دا سیلاب متوقع اے ایں ویلھے اتھوں 112000 کیوسک پانڑیں گزردا پئے محکمہ آبپاشی دی اطلاع موجب اج شام تئیں 150000 توں200000 کیوسک تک پانڑیں گزرنڑ دی توقع اے جیں دی وجہ تون تلوے توں درمیانے درجے تک دا سیلاب متوقع اے انہاں ڈسایا جو انتظامیہ سیلابی صورتحال نال نبڑنڑ اتے لوکاں دی حفاظت کیتے سارے انتظامات پورے کرگھدن۔