ملتان ۔ 11 ستمبر (اے پی پی) حکومت پنجاب دی ہدایت تے ڈویژنل انتظامیہ ڈینگی دے خلاف طبل جنگ وجا ڈتا ۔کمشنر ملتان ڈویژن جاوید اختر محمود ہفتہ کوں ڈویژن بھراچ اینٹی ڈینگی ڈے مناونڑ دا حکم ڈتے ۔ایں سلسلے اچ سارے سرکاری محکمےں کوں باقاعدہ مراسلہ وی جاری کرڈتا گئے ۔ جیں موجب ہفتے دے ڈینھ سارے سرکاری دفتراں اچ عمومی صفائی کروائی ویسی ۔دفتراں اچ سٹورز اچ پئی ناکارہ چیزاں کوں مناسب طریقے نال تلف کیتا ویسی ۔ سارے سرکاری اداریں اچ سربراہ دی موجودگی لازمی ہوسی جیرھی جو ایں سارے عمل کوں ازخود مانیٹر کرنڑ دے پاپند ہوسن ۔دفتراں اچ صفائی خصوصاً ڈینگی کنٹرول بارے فوکل پرسن نامزد کیتا ویسی تے ساریاں سرکاری عمارتاں وچ مچھر مار سپرے کروایا ویسی ۔ ایں بارے کمشنر ملتان جاوید اختر محمود آکھیے جو ڈینگی مچھر توں ڈرنڑ دی بجائے ایندی افزائش روکنڑ کیتے اساں ساریں کوں کردار ادا کرنڑاں ہوسی ۔
