ملتان۔03ستمبر(اے پی پی سرائیکی سروس)جگ مشہور مہان سرائیکی گلوکار شفا اللہ روکھڑی دی وفات تے وسیب دے فنکاراں ڈکھ تے افسوس کریندیں ہوئیں آکھیا جو ایجھے فنکار صدیاں بعد جمدن۔انہاں دی وفات نال موسیقی دی دنیا اچ جیڑھا خلا آگئے او کئی عرصے تئیں پُر نہ تھی سگسی۔انہاں دی وفات سارے وسیب سانگے وڈا ڈکھ اے۔ ملکہ موسیقی محترمہ ثریا ملتانیکر شفاء اللہ روکھڑی دی وفات تے ڈکھ تے افسوس کریندیں ہوئیں آکھیا جو انہاں دی بہوں مٹھی آواز ہئی،انہاں دی عمر وی اتنی وڈی کائنا ہئی،اجاں انہاں دے گاونڑ دے ڈینھ ہن پر او اللہ سئیںکوں پیارے تھی گئے۔جگ مشہور گلوکار عطا اللہ خان عیسیٰ خیلوی آکھیا جو شفا اللہ خان روکھڑی چنگے گلوکار دے نال بہوں چنگے انسان وی ہن ،انہاں کوں اپنڑی دھرتی،اپنڑی مٹی اتے اپنڑے وسیب دے نال اپنڑی ماءبولی نال بہوں پیار ہئی ۔سرائیکی سنگرز احمد نواز چھینہ، شہزادہ آصف علی گیلانی ، اجمل ساجد، ساجد ملتانی ، رمضان بے وس، ثوبیہ ملک ، حاجی غلام فرید کنیرہ، جمیل پروانہ، کوثر جاپانی، عظمت نیازی ، شرافت علی خان ، واجد بغدادی تے بئے فنکاراں آکھیا جو شفاءاللہ روکھڑی جیہے فنکار قوم دا سرمایہ ہوندن۔سرائیکستان قومی کونسل دے تعزیتی اجلاس اچ ظہور دھریجہ ، حاجی عید احمد دھریجہ، حیات اللہ خان نیازی، عابد سیال ، زبیر دھریجہ، سرائیک خان ملتانی ، پرویز قادر خان ، اجمل دھریجہ، روشن ضمیر مہوٹہ ، سراج احمد ساغر، خضر حیات مہوٹہ ، جعفر مہوٹہ ، شیخ ممتاز الرحمن ، شبیر بلوچ، افضال بٹ ، بابا ممتاز، ظفر مسکین، بلال بزمی، جاوید شانی، شریف بھٹہ ، چوہدری مبشر، چوہدری عامر، ایاز محمود دھریجہ، سلطان محمود دھریجہ ، سانول اعوان ، احسان اعوان ، آصف دھریجہ ،مقصود دھریجہ، نذیر احمد بزمی ،جگ مشہور مہان سرائیکی گلوکار شفا اللہ روکھڑی دی وفات تے افسوس کریندیں ہوئیں مرحوم دی مغفرت سانگے دعا کیتی۔
