اسلام آباد ۔ 26 ستمبر (اے پی پی) وزیر خارجہ مخدوم شاہ محمود قریشی آکھیے جو اقوام متحدہ جنرل اسمبلی دے خطاب وچ ہک واری ول دنیا دے سامنڑے بھارت دے نہتے کشمیریاں تے ظلم کوں بے نقاب کیتے۔ وزیر اعظم عمران خان دی اقوام متحدہ جنرل اسمبلی دے 75ویں اجلاس اچ کیتے گئے خطاب دے حوالے نال بیان اچ وزیر خارجہ آکھیے جو وزیراعظم بھارت ولوں مقبوضہ جموں و کشمیر اچ کیتے گے 05 اگست 2019 دے یکطرفہ اقدامات، کمیونیکیشن بلیک آوٹ،نہتے شہریاں تے پلیٹ گنز دا استعمال ،کالے قوانین دا اطلاق، ڈومیسائل قوانین اچ ترامیم دے ذریعے مقبوضہ جموں و کشمیر اچ آبادیاتی تناسب کوں بدالنڑ دی کوشش ، انسانی حقوق دیاں سنگین خلاف ورزیاں، بین الاقوامی قوانین اتے جنیوا کنونشن توں انحراف کوں واضح انداز اچ اقوامِ عالم دے سامنڑے رکھیا ۔وزیر اعظم عمران خان بھارت ولوں فالس فلیگ آپریشن دے خدشات دا ذکر کریندے ہوئیں واضح کیتے جو بھارت آپنڑی معاندانہ پالیسیاں پاروں، خطے دے امن و امان نال کھیڈا پئے ۔وزیر اعظم ہک واری ول بین الاقوامی سطح تے واضح کیتے پاکستان، فلسطین دے حوالے نال اقوام متحدہ سیکورٹی کونسل دیاں قرارداوں دے مطابق ڈو ریاستی حل دا حامی اے۔وزیر اعظم عمران خان افغانستان اچ قیام امن کیتے پاکستان دیاں مصالحانہ کاوشاں کوں دنیا دے سامنڑے رکھیندے ہوئیں شرپسند عناصر دی موجودگی دے خطرے توں وی خبردار کیتے ۔
