سرائیکی عوامی سنگت پاکستان تے سرائیکی عوامی تریمت تحریک پاکستان دء ہیٹھ خانپور اچ سرائیکی اڳواݨ ملک محمد اکبر مرحوم دی پیلھی برسی تے تعزیتی کٹھ تھیا

خانپور28اکتوبر (اے پی پی )سرائیکی عوامی سنگت پاکستان تے سرائیکی عوامی تریمت تحریک پاکستان دء ہیٹھ خانپور اچ سرائیکی اڳواݨ ملک محمد اکبر مرحوم دی پیلھی برسی تے تعزیتی کٹھ تھیا، ایں کٹھ اچ سینئر، دانشور صحافی نذیر لغاری، ظہور دھریجہ، عبدالخالق اچھا، قاسم خان لاشاری، مہر مظہر کات، ڈاکٹر طارق محمود، صفدر کلاسرا، مجید کھوکھر، رئیس سہیل، میاں عثمان طاہر، رانا نعیم، سجاد ملک، نذر عباس، ملک افضل، سلطان لاشاری، رشید جرانی، اسحاق لغاری آصف دھریجہ، سرائیکی عوامی تریمت تحریک دی رہبر ادی عابدہ بتول، ادی کرن لاشاری، ادی سعدیہ شکیل، ادی نِیناں، ادی اصفہ، ادی رخسانہ حمید، ادی انیلہ عابد، ادی یاسمین ملک، ادی ممتاز ملک، ادی میمونہ مصطفیٰ، ادی سدرہ ملک، ادی عاصمہ ملک، مہاندرے شاعر امان اللہ ارشد، جہانگیر مخلص، اخلاق مزاری، شاہد عالم شاہد، سعید ثروت، صوفی مصطفیٰ عزیز، لوک فنکار موہن بھگت تے سیکڑاں تریمتیں شرکت کیتی. سینئر صحافی نذیر لغاری، ظہور دھریجہ، عبدالخالق اچھا، راشد عزیز بھٹہ، نورتھہیم تے ٻنہاں رہنماواں نے ملک اکبر دی سرائیکی قوم کیتے خدمات کوں خراج عقیدت پیش کریندیں آکھیا جو اساں ملک اکبر داعظیم مشن پورا کرݨ سانگے جدوجہد جاری رکھیسوں، سرائیکی قوم کوں حق تے شناخت ݙیوݨ کیتے سرائیکی صوبہ ضروری اے. سرائیکی عوامی تریمت تحریک دی رہبر ادی عابدہ بتول، ادی کرن لاشاری، ادی رخسانہ حمید، ادی انیلہ عابد، ادی افصا ملک تے ادی میمونہ مصطفیٰ آکھیا جو ملک اکبر دا وچھوڑا سرائیکی تحریک دا ٻہوں زیان اے مگر اساں اُنہاں دیاں خدمات کوں آپݨیں طاقت بݨا قوم دے حق سانگے جدوجہد جاری رکھیسوں. رہبر ادی عابدہ بتول آکھیا جو اڄ دے ایں عظیم کٹھ اچ تریمتیں دی بھرپور شرکت گھپ اندھارے اچ سوجھلے دی پیلھی لاٹ اے، تریمتیں دء بغیر کوئی تحریک کامیاب نی تھی سڳدی، جݙاں 30 فیصد تریمتیں تحریک دا حصہ بݨ ڳیاں انشااللہ سرائیکی قوم کوں حق وی ملسی تے صوبہ سرائیکستان وی ضرور بݨسی. رہبرادی عابدہ بتول آکھیا جو ہݨ ماواں، بھیݨیں تے دھیریں آپݨیں نسلاں دی بقاء تے حقوق سانگے جاڳ پئین، سرائیکی عوامی تریمت تحریک تنظیم سازی شروع کر ݙتی اے، تریمتیں دا جوش تے جذبہ ݙیکھ تے لڳدے ساݙی منزل ہݨ پرے کائنی، انشاللہ وسیب دے حقوق دی جدوجہد تے تحریک اچ تریمتیں مورھی دستے دا کردار نبھیسن تے آپݨیں حق کیتے آپݨیں بھرانواں نال جدوجہد کوں تیز کریسن. کٹھ اچ شاعراں آپݨاں کلام پیش کیتا تے لوک فنکار موہن بھگت قومی گیت پیش کیتے، کٹھ اچ اسٹیج سیکریٹری دیاں ذمیواریاں ادی نیناں تے سعدیہ شکیل نبھایاں، اخیر اچ خواجہ غلام فرید دیاں کافیاں تے قومی گیت وی پیش کیتے ڳئے.