اسلام آباد۔24نومبر(اے پی پی)ترجمان دفتر خارجہ محمد حفیظ چوہدری بھارت دے غیر قانوی قبضے اچ  جموں و کشمیر دے ضلع نگروٹا اچ نام نہاد دہشت گردی دے حملے سانڳے بھارتی وزارت خارجہ اچ غیر ملکی سفیراں دے ہک گروپ کوں ݙتی ڳئی بریفنگ تے ولدا ݙیندے آکھیا جو پاکستان اچ بھارت دی  دہشت گرد سرگرمیاں دی فعال منصوبہ بندی،مالی معاونت اتے عملدرآمد اتے مقبوضہ کشمیر اچ ریاستی دہشت گردی بارے ناقابل تردید شواہد جاری کرݨ توں بعد بھارتی حکومت پاکستان مخالف مہم تیز کر ݙتی اے۔ترجمان آکھیا جو بھارتی الزامات اتے  کوڑے بیانیے نال حقائق نئیں بدل سڳدے ۔ بھارت اپݨے کوڑے بیانیےنال دنیا کوں گمراہ نئیں کر سڳدا۔ترجمان آکھیا جو بھارتی وزارت خارجہ دی  بریفنگ مقبوضہ کشمیر اچ کہیں مبینہ منصوبہ بند حملے اچ پاکستان کوں شرارتی طور تے ملوث کرݨ دی ہک ٻئی کوشش اے۔ترجمان آکھیا جو ہک واری ولا جگ کوں ݙسیندے پئے ہیں جو بھارت پاکستان کوں بدنام کرݨ کیتے جعلی آپریشن جھیاں کجھ وی اقدامات کرسڳدے، پاکستان بھارت کوں بے نقاب کریندا رہسی اتے بھارتی بے بنیاد پروپیگنڈے  نال عالمی برادری کوں گمراہ نہ تھیوݨ ݙیسی۔