دھریجہ نگر دے دورے وچ اللہ پاک سرائیکی تریمت تحریک کو عزت بخشی تے اساݙے واسطے اعزاز ھے جو سرائیکی حقوق سانگے سرائیکی تریمت تحریک جہڑے سفر دا آغاز کراچی شھر وچوں شروع کیتا ھا، اڄ دھریجہ نگر تئیں کامیابی نال آ ڳئے،اتے انشااللہ العزیز سرائیکی عوامی تریمت تحریک جلد سرائیکی تریمتیں سانگے ہک نمائندہ تنظیم ھوسی اتے پورے وسیب دے ہر وستی موضع تئیں سرائیکی حقوق دا سنہیا ݙیسوں ،،،ـــــــــــ سرائیکی عوامی تریمت تحریک دی صدر ادی کرن لشاری اے پی پی نال گالھ مہاڑ کریندے آکھے ۔ ادی کرن لشاری سئیں ظہور احمد دھریجہ صیب دی تعریف کیتی جو انھاں عظیم سرائیکی روایات دے مطابق قوم دیاں دھیریں بھیݨیں کوں عزت تے ماݨ ݙتے،اور نال ہی انھیں کوں سرائیکی زبان دی اݨگݨت خدمات دے اعزاز وچ حالیہ تاج پوشی تے وی مبارکباد پیش کریندی ھاں، تے ظہور احمد دھریجہ سئیں واقعی سرائیکی قوم دا تاڄ ہن، ظہور احمد دھریجہ صاحب دے سرائیکی کیتے ان گینڑویں کارنامے تے محنت ہے، 30سال تو ودھ عرصے تو سرائیکی زبان دا اخبار جھوک کامیابی نال چلیندے پئین، اتے جھوک اخبار صرف اخبار ہی نی جڈاں جو سرائیکی خطے دا ترجمان ھے، ایہا جھوک اخبار دی بدولت لکھاں لوک نظریہ سرائیکی تو روشناس تھئے، اور سرائیکی کاز کیتے ہزاراں نویں کارکنان تیار تھئے، انھیں دی سرپرستی وچ جھوک پبلشر نے اݨگݨت سرائیکی شعرا تے لکھاریاں دی ہزاراں کتاباں چھاپ تے سرائیکی ادب کوں ہمیشہ کیتے عام و خاص تے محفوظ کرݙتے،، میں سمجھدی ھاں اڄوکے دور دے وچ سرائیکی زبان تے ظہور دھریجہ ہکو شے دے ݙو ناں ھن، اللہ پاک سئیں ظہور دھریجہ کوں ہمت ڈیوے ۔ ادی کرن لشاری تریمتیں دے تحریک اچ کردار بارے گالھ مہاڑ کریندے آکھے جو کہیں وی قوم دی انقلابی تے حقوق دی جنگ وچ تریمتیں دا کردار ٻہوں اہم ھوندے، جیکر کہیں قومی تحریک وچ عورتاں شامل نہ ھوون تے او تحریک کامیاب نی تھی سڳدی، اساکوں ماݨ ھے اپݨے اسلاف تے رہنماویں تے جنھاں عورتاں دے قومی شعور کو زبان ݙتی،، انھاں آکھے جو سرائیکی صوبے دا مطالبہ صرف سرائیکی قوم دا مطالبہ کائینی ، جڈاں جوسرائیکی خطے وچ راہݨ والی ہر قوم دا مطالبہ اے، سرائیکی عورت قومی شعور رکھݨ والی بہادر عورت ھے اتے سرائیکی صوبے دی تحریک دے وچ سرائیکی عوامی تریمت تحریک دی شکل وچ شہیدہ صفیہ خانم بنت مظفر خان شہید دے کردار دا تسلسل اے انھاں بیا آکھے جو اساں دھریجہ نگر سمیت پورے سرائیکی وسیب دیاں عورتاں کوں دعوت ݙیندے ھیں جو آوسرائیکی عوامی تریمت تحریک نال رل تے سرائیکی دھرتی دے حقوق دی جنگ وچ شامل تھیون تاں جو مردیں دی بانھ بیلی بنڑ تے آپ دی منزل تے پج سگوں
