ملتان۔5دسمبر (اے پی پی) نشترہسپتال ملتان اچ چووی ڳھنٹیاں اچ کورونا نال کوئی ہلاکت کائنی تھئی جڈانجو ہسپتال اچ زیر علاج 21 مریضاں دی حالت تشویشناک اے جڈانجو ترائے مریض وینٹی لیٹرز تے ہن۔ نشتر ہسپتال اچ کورونا دی ݙوجھی لہر نال نبڑݨ سانڳے چنڳے اقدامات کیتے ڳئن۔ ہک مریض دے رشتے دار عبداللہ اے پی پی نال ڳالھ مہاڑ کریندیں ہوئیں ݙسیا جو میݙے کزن دا کجھ ݙینھ پہلے کورونا ٹیسٹ پازیٹو آئے اتے اونکوں نشتر ہسپتال پڄایا ڳیا۔ کجھ ݙینھ دے علاج دے بعد اڄ او ٹھیک تھی کراہیں واپسی آپݨے گھر ویندے پئن۔ نشترہسپتال توں جاری اعداد وشمار دے مطابق ایں ویلھے نشترہسپتال اچ کورونا دے165 مریض زیرعلاج ہن۔ ہسپتال اچ 272 مریضاں دے علاج دی سہولت موجود اے۔
