وزیراعلیٰ دے زیر صدارت اجلاس، ٹیچنگ ہسپتال ڈیرہ غازی خان اچ ایمرجنسی و او پی ڈی بلاک، تحصیل تونسہ اچ سڑکاں دی تعمیر، وہوا ترقیاتی پیکیج دے تحت پیوݨ دے پاݨی، آبپاشی دے منصوبیاں، فیملی پارک بݨاوݨ دی منظوری

لاہور۔19دسمبر(اے پی پی)وزیراعلی عثمان بزدار ہسپتال بݨاوݨ دی سکیم کوں سالانہ ترقیاتی پروگرام اچ رلاوݨ دی منظوری ݙیندے ہوئے ڈویژنل ہیڈ کواٹرز تے پناہ گاہیں، ٹیچنگ ہسپتال ڈیرہ غازی خان اچ ݙو ارب روپے دی لاگت نال ایمرجنسی و او پی ڈی بلاک بݨاوݨ، تحصیل تونسہ اچ 9ارب روپے مختلف سڑکاں دی تعمیر، وہوا ترقیاتی پیکیج دے تحت پیوݨ دے پاݨی، آبپاشی دے منصوبیاںس ودھا فیملی پارک بݨاوݨ دی وی منظوری ݙے ݙتی۔ اے فیصلے وزیر اعلی پنجاب سردار عثمان بزدار دی اڳواݨی اچ ہک اجلاس اچ کیتے ڳین۔ پنجاب اچ پناہ گاہیں پاکستان بیت المال دے گانڈھے نال بݨسن۔ اجلاس اچ چوکی والا(این55 )تحصیل تونسہ توں این70 (چاپڑ/بلوچستان )براستہ زین، بارتھی اتے کھرڑ بزدار 122کلومیٹر سڑک دی بحالی و تعمیر تھیسی جیندے تے 9 ارب روپے لاگت آسی ۔ چوکی والا تا زین سڑک پنجاب حکومت اپݨے وسائل نال بݨیسی اتے باقی سڑک بݨاوݨ کیتے وفاقی حکومت توں فنڈز منڳیے ویسن۔ اجلاس پی پی 289 ڈیرہ غازی خان شہر دے اربن روڈ پیکیج کیتے سیوریج منصوبے دی منظوری ݙتی ڄݙاں جو وہوا ترقیاتی پیکیج دے تحت محکمہ آبپاشی دے منصوبیاں کوں سالانہ ترقیاتی پروگرام اچ رلا ڳھدا ڳئے اتے وہوا ترقیاتی پیکیج دے تحت پیوݨ دے پاݨی دیاں سکیماں مکمل کیتاں ویسن۔ وہوا اچ واٹر سپلائی، فلٹریشن پلانٹس اتے ہینڈپمپس لڳسن۔ وہوا اچ فیملی پارک وی بݨایا ویسی۔ وہوا دیاں 7 سڑکاں دی بحالی و تعمیر دی وی منظوری ݙتی ڳئی اتے وہوا دیہی مرکز صحت اپ گریڈ کرݨ دا فیصلہ کیتا ڳئے۔ اجلاس اچ تونسہ پریس کلب کیتے 10 لکھ روپے گرانٹ وی منظور کیتی ڳئی۔