اسلام آباد۔18جنوری  (اے پی پی):صدر مملکت ڈاکٹر عارف علوی ٻال کوں ݙوسال ما دا کھیر پلاوݨ دی اہمیت ݙسیندے ہوئیں آکھیے جو مسیتاں اچ امام ، میڈیا اتے سول سوسائٹی ایں حوالے نال آگاہی ݙیوݨ اچ آپدا کردارنبھاون ،ٻالاں کوں ما دا کھیر پلاوݨ نال ما تے ٻال ݙوہیں بیماریاں توں محفوظ رہندن ۔ڈبے دا کھیر ما دے کھیر دا متبادل کائنی۔ اے ڳالھ انہاں سنوار کوں ایوان صدراچ ٻالاں کوں ما دا کھیر پلاوݨ دے ودھارے تے تحفظ دے موضوع تے سیمینار توں خطاب کریندے ہوئیں آکھی اے ۔ایں موقع تے بیگم ثمینہ ڈاکٹر عارف علوی وی موجود ہن۔ صدر ڈاکٹر عارف علوی آکھیے جو ایمان دی قوت توں انسان چنڳائی دا رستہ چݨدے، پاکستان اچ قانون تے عملداری دا فقدان اے، ملک اچ مجرماں دے خلاف سزا اتے جزا دا نظام موجود اے تاں جو ایندے تے موثر عمل درآمد یقینی بݨاوݨ ناگزیر اے ، اساݙے معاشرے اچ مذہب، کلچر، قانون اتے قانون دا اطلاق اہمیت رکھیندے ، انسانیت تاریخ مختلف تدریجی مرحلے توں گزری اے ، ویلھے دے نال انسان اچ معاشرتی بہتری آئی اے ،اساں ماضی دیاں چنڳیاں چیزاں کوں چھوڑ ݙتے ، ما دا کھیر حضرت آدم اتے حضرت حوا دے دور توں ٻالاں کوں مفت اچ دستیاب اے ، قرآن پاک اچ ݙو توں ݙھائی سال ٻال کوں ما دا کھیر پلاوݨ دی تاکید کیتی ڳی اے ۔