اسلام آباد۔29 جنوری(اے پی پی)کراچی ٹیسٹ قومی ٹیم 7 وکٹاں توں اپݨے ناویں کر قھدے اتے بابر اعظم بطور ٹیسٹ کپتان پہلے امتحان اچ کامیاب رہین۔جنوبی افریقا پاکستان کوں جیت کیتے 88 رنز دا ہدف ݙتے جیڑھا پاکستان 3 وکٹ دے نقصان تے پورا کر ڳھدے۔ پہلی اننگز اچ جنوبی افریقہ 220 رنز بݨائے ہن، ولدے اچ قومی ٹیم فواد عالم دی سنچری پاروں 378 رنز بݨاوݨ اچ کامیاب رہی ہئی اتے مہمان ٹیم تے پاکستان کوں 158 رنز دی وتھی ملی۔ اپݨی ݙوڄھی اننگ اچ مہمان ٹیم 245 رنز تے آؤٹ تھئی۔ ولدے اچ ہدف دے پچھو قومی ٹیم دے ترائے کھلاڑی عمران بٹ 12، عابد علی 10 اتے کپتان بابراعظم 30 رنز تے آؤٹ تھین۔ اظہر علی 31 اتے فواد عالم 4 رنز تے ناٹ آؤٹ رہین۔ نعمان علی ڈیبیو میچ اچ ہک اننگز اچ 5 وکٹاں ڳھدن اتے ڈیبیو میچ اچ اے کارنامہ ݙیوݨ آلے 12 ویں پاکستانی کھلاڑی بݨین۔ یاسر شاہ 4 شکار کیتن اتے ہک وکٹ حسن علی دے کھاتے پئی۔ یاسر شاہ اتے نعمان علی میچ اچ 7، 7 وکٹاں ڳھدن۔ شاندار سنچری تے فواد عالم کوں میچ دا بہترین کھلاڑی قرار ݙتا ڳئے۔
