راولپنڈی۔3فروری(اے پی پی)پاکستان اتے جنوبی افریقہ دی کرکٹ ٹیماں وچال سیریز دا ݙوجھا اتے آخری ٹیسٹ (اڄ) خمیس کوں راولپنڈی کرکٹ سٹیڈیم اچ کھیݙیا ویسی۔پاکستان کوں سیریز اچ  ہک۔ صفر دی برتری  اے۔ کراچی اچ کھیڈے ڳئے پہلے ٹیسٹ میچ اچ گرین کیپس 7 وکٹاں نال جت ڳئن ۔ پاکستانی ٹیم بابر اعظم دی قیادت اچ کھیڈسی اتے جنوبی افریقہ دی قیادت دے فرائض کوئنٹن ڈی کاک ݙیسن۔ جنوبی افریقن ٹیم 23 سال بعد راولپنڈی کرکٹ سٹیڈیم اچ ٹیسٹ میچ کھیڈسی۔ پروٹیز آخری واری 6 اکتوبر 1997 اچ راولپنڈی دے میدان تے ٹیسٹ میچ کھیݙیےجیڑھا جو  ہر جت دے  بغیرمک ڳئے ، ایں میچ اچ پاکستان دے کپتان سعید انور اتے جنوبی افریقہ دے کپتان آنجہانی ہنسی کرونئے ہن۔ ٹیسٹ میچ اچ علیم ڈار اتے احسن رضا فیلڈ امپائرنگ دے فرائض ݙیسن۔ آئی سی سی ایلیٹ پینل اچ شامل علیم ڈار  133 ٹیسٹ میچاں اچ امپائرنگ کر چکن۔ آصف یعقوب تھرڈ امپائر، راشد ریاض فورتھ امپائر اتے محمد جاوید ملک میچ ریفری دی حیثیت نال ذمہ داریاں پوریاں کریسن۔ ٹیسٹ سیریز توں بعد جنوبی افریقہ دی ٹیم ترائے ٹی 20  انٹرنیشنل میچز دی سیریز وی کھیݙسی، سیریز دا پہلا میچ 11 فروری، ݙوجھا 13 فروری اتے تریڄھا میچ 14 فروری کوں کھیݙیا ویسی ، اے میچ قذافی سٹیڈیم، لاہور اچ تھیسن۔