تحریر :ظہیر الحق
ترجمہ: ڈاکٹرسعدیہ کمال
محمد طیب
اڄ دے جدید دور اچ صنعتی شعبے کوں کہیں وی ملک دی معاشی شرح نمو دے ودھارے تے عوام فلاح و بہبود کیتے بنیاد ݙیندے ۔ مختلف ملکاں تے حکومتاں اقتصادی سست روی توں بچݨ کیتے ہمیشہ متحرک صنعتی شعبہ دی متمنی رہ ڳئن تے کجھ اوکھے حالات اچ وی شعبہ دی معاونت دا عمل جاری اے۔ ایں حوالے نال ہرطرح دے ممکن اقدامات کیتے ویندن جیں توں نہ صرف برآمدات اچ ودھارا تھیندے بلکہ غیر ضروری قرضیں دے ٻوجھ توں نجات اچ وی مدد ملدی اے ۔ ݙوجھے پاسے کاروبار دی اچ جھک ، بدعنوانی ، اقرباء پروری اتے ایڈہاک ازم دی وجہ توں معاشی ترقی دا عمل متاثر تھیندے اتے ترقی پذیر ملکاں اچ اکثر ایں طرح دے حالات ہوندن جتھاں مقتدر حلقے قومی وسائل کوں ذاتی مقاصد کیتے استعمال کریندن ۔
پاکستان کوں وی ایں طرح دے حالات دا سامݨاں رہ ڳئے جݙاں ماضی دیاں حکومتاں دیاں پالیسیاں دی وجہ توں صنعتی شعبہ متاثر تھئے تے کئی صنعتی شعبے بند تھی ڳئن جݙاں جو ٻئے صنعتی اداریں دی پیداوار 40فیصد تئیں گھٹ تھی ڳئی ۔ ساریں توں ودھ شعبہ متاثر تھیوݨ آلا پاور لومز دا ہئی تے کئی مالکان اپݨی صنعتی مشینری اوݨے پوݨے ویچ وٹا ݙتی ۔ تاں جو موجودہ حکومت صنعتی شعبہ دی بحالی تے توجہ ݙتی تے ایں مقصد کیتے کاروبار دوست پالیسیاں بݨائیاں ۔ عالمی سطح تے کورڈ ۔19دی صورتحال پاروں مقامی صنعت کاراں کوں مواقع ملیے جو برآمدات ودھاون
۔ صنعتی اداریں اپݨی پوری استعداد توں پیداوار شروع کرݙتی کیوں جو وݙے برآمدی آرڈرز دی تکمیل کوں یقینی بݨاوݨا ہئی جیں توں روزگار دے وی لکھاں نویں موقع پیدا تھئے ۔ کورونا وباء دے دوران حکومت انتہائی دانشمندی نال اقدامات کیتے جیں توں نہ صرف کارکناں دے روزگار کوں تحفظ ملیا بلکہ صنعتی شعبے دی شرح نمو وی ودھ ڳئی ۔ حکومت برآمدی شعبہ تے خصوصی توجہ ݙتی تے انہاں یونٹس کوں ودھ توں ودھ مراعات ݙتیاں ۔ سٹیٹ بینک آف پاکستان صنعتی یونٹس دی مالی معاونت کیتے خاطر خواہ اقدامات کیتے۔ موٹر وے ایم تھری تے صنعتی شہر وساوݨ دی رفتار ودھ ڳئی جݙاں جو علامہ اقبال انڈسٹریل اسٹیٹ وی تکمیل دے نیڑے ہے ،ایں ویلھے صنعتی یونٹس اتے ایس ایم ایز ݙے پیداواری استعداد توں ترائے گنا ودھ برآمدی آرڈرز موجود ہن جیں توں انہاں کوں پیداواری صلاحیتاں ودھاوݨ تے توجہ ݙیوݨی پئی اے تاں جو برآمدی آرڈرز وختی ݙتے ونڄ سڳن ،توقع اے جو ٹیکسٹائل دے شعبہ اچ گھٹ توں گھٹ 4ہزار ایئر جیٹ لومز نویاں لاتیاں ونڄ سڳن جیں توں قومی برآمدات اچ چنڳاں ودھارا متوقع ھے ۔
فیصل آباد ایوان صنعت و تجارت دے صدر انجینئر حافظ احتشام جاوید آکھیے جو اے ڳالھ وݙی حوصلہ افزا اے جو اکتوبر توں دسمبر 2020ء دے دوران برآمدات دا حجم 2ارب ڈالر ماہانہ توں 2.357ارب ڈالر ماہانہ تئیں پڄ ڳئے ۔ ݙوجھے پاسے حکومت مشینری دی درآمد تے وی پالیسی اچ نرمی تے سہولتاں متعارف کروائن تے لمبی مدت دے قرضے ݙتے ڳئن ۔ انہاں آکھیے جو ایں ویلھے ٻہوں سارے صنعتکار 30توں 35ہزار ایئر جیٹ لومز درآمد کریندے پئن جیں توں شعبہ کوں ڈیجیٹل مشینری تے منتقل کیتا ونڄ سڳسی ۔ انہاں آکھیے جو این رحجان توں زورگار دے ودھ سارے موقع پیدا تھیسن تے آندے ݙو یا ترائے سال اچ صرف فیصل آباد 10ملین نویں روزگار دے موقع ملسن ۔حافظ احتشام مزید آکھیے جو فیصل آباد انڈسٹریل اسٹیٹ اینڈ مینجمنٹ کمپنی (فیڈمک ) پہلے توں موجود اتے نویں زونز دی تعمیر و ترقی دا عمل تکھا کرݙتا ڳئے ، انھاں آکھیے جو اساں سرمایہ کاری ، کاروباری سوکھ تے طریقہ کار کوں سوکھا بݨاوݨ دے اقدامات کوں منیندوں ۔ ایندے توں انج حکومت پنج وݙی برآمدی صنعتاں کیتے توانائی دی بلا تعطل فراہمی ، بجلی اتے گیس دیاں قیمتاں گھٹ کرݨ کیتے وی اقدامات کیتن جیں توں صنعت کاراں دا اعتماد بحال تھی ڳئے جیں توں اساں 2025ء دے برآمدی ہدف کوں حاصل کرسڳسوں ۔
پاکستان ہوزری مینو فیکچررز اینڈ ایکسپورٹرز ایسوسی ایشن دے سابق وائس چیئرمین کا شف ضیا آکھیے جو حکومت مالیات دے مسائل کوں کامیابی نال حل کیتا ڳئے تے ایں حوالے نال برآمدی شعبیں کوں ریفنڈز دی وختی ادائیگی یقینی بݨائی ویندی پئی اے ۔ انہاں آکھیے جو حکومت اقدامات توں برآمد کنندگان دی مالی مشکلات دے خاتمہ اچ مدد دے نال نال اعتماد وی ودھ ویسی ۔ انہاں آکھیے جو پہلے ریفنڈز دی عدم ادائیگی دی وجہ توں برآمد کنند گان دی باری رقم پھس ویندی ہئی لیکن ہݨ ادائیگیاں دا نظام وضع کر ݙتا ڳئے جیں توں صنعتی شعبہ کوں مزید حوصلہ ملسی ۔ ایندے توں علاوہ مجوزہ پنج سالہ ٹیکسٹائلز دی برآمدی پالیسی توں برآمدات اچ ݙو گنا ودھار تھی سڳدے تاں جو ایں حوالے نال پالیسیاں دا تلسلس جاری رکھݨاں ہوسی ۔
آل پاکستان ٹیکسٹائل پراسیسنگ ملز ایسوسی ایشن فیصل آباد ریجن دے چیئرمین شیخ شاہد جاوید آکھیے جو کݙاہیں فیصل آباد کوں پاکستان دا مانچسٹر سمجھیا ویندا ہئی تاں جو ماضی اچ حکومت دیاں ناقص پالیسیاں پاروں اے مقام ونڄا بیٹھوں مگر موجودہ حکومت دیاں ݙو رس پالیسیاں تے صنعتی شعبے کیتے بہترین مراعات پاروں ونڄا ہویا اے وقار ول آندا پئے ۔ انہاں آکھیے جو وزیراعظم عمران خان دے واضح وژن پاروں نجی شعبہ دی حوصلہ افزائی تھیندی اے تے قومی معیشت دی ترقی دا انجݨ صنعتی شعبہ دی بہتر کارکردگی دی بدولت چنڳے نتیجے ݙیندا پئے ، انہاں آکھیے جو انہاں پالیسیاں پاروں نینگر طبقے کیتے روزگار دے موقع ودھ ویسن کجھ سال پہلے سکریپس لومز ویچی ویندی پئی ہئی لیکن ہݨ اے ڳالھ چنڳی اے جو لومز ݙینھ رات کم کریندیاں پئن ۔ انہاں بھارت توں کپڑے دی سمگلنگ تے قابو پاوݨ دے وزیراعظم عمران خان دے اقدامات دی وی تعریف کیتی جیں توں مقامی شعبہ متاثر تھیندا پیا ہئی ۔ انہاں آکھیے جو کپڑے دی درآمدات ؤی یومیہ 7.5ملین توں 10ملین میٹر کیتی ویندی پئی ہئی جنہاں کوں مکاوݨ نال ہݨ گوجرانوالہ اچ واٹر جیٹ لومز ݙینھ رات کم کریندیاں پئن تاں جو شفون دی مقامی طلب پوری کیتی ونڄ سڳے
۔انہاں مزید آکھیےجو اینویں فیصل آباد اچ وی واٹر جیٹ لومز دے ترائے یونٹس لاتے ڳئن تاں جو مقامی طلب کوں پورا کیتا ونڄ سڳے ۔انہاں آکھیے جو حکومت دے بجلی اتے گیس دی قیمت اچ ریلیف دے اقدامات انقلابی ہن تے صنعت کار وی قومی معیشت دے استحکام کیتے حکومت دی بھر پور معاونت کریسن ۔
