اسلام آباد۔10مارچ  (اے پی پی):سرائیکی وسیب دے عظیم گلوکار پٹھاݨے خاں دا اڄ 21 واں ورھیݨاں اے ، انہاں دا اصل ناں غلام محمد ہئی. او1926ء اچ تبو والا نزد سنانواں، کوٹ ادو اچ ڄمیے ۔16 سال دی عمر اچ ملتان دے استاد امیر خان توں موسیقی سکھݨ شروع کیتی. بارہاں بارہاں گھنٹے روزانہ ریاض کریندے ہن جیں دے نتیجے اچ ودھ ساری مقبولیت پاتی۔ صدارتی تمغہ حسن کارکردگی وی ملیا. 9 مارچ 2000 کوں اللہ کوں پیارے تھی ڳئے۔ کوٹ ادو دی ہک وستی اچ غربت دی زندگی گزارݨ آلا اے فنکار دل دا ٻہوں امیر ہئی ۔میں جنہاں ݙینھاں پنجاب یونیورسٹی دا طالب علم ہم تاں ہاسٹل اچ رہندا ہم ، اتھاں انہاں دے کئی قدردان ہن ، جنہاں اچ برادرم مشتاق صوفی ویہن. پٹھاݨے خاں کوں شاید اوہے سݙیندے ہن اتے پاکستان ٹیلی ویژن تے ریکارڈنگ کراتے کجھ کماوݨ دا موقع ݙیندے ہن لیکن میݙا خیال اے جو اے دریادل درویش کمائی اتھاہیںیاراں تے لٹیندے ہن. نینگر طلبا انہاں دی خدمت دی کوشش کریندے لیکن اوکینٹیناں تے پورے ٻل، اصرار دے نال اے آکھ تے خود ادا کریندے ہن جو تساں تاں میݙے ٻال او

1976ء اچ بھٹو ایوان وزیراعظم اسلام آباد اچ پٹھاݨے خان دے اعزاز اچ محفل سجائی ۔ پٹھاݨے خان عارفانہ کلام سݨایا ، خواجہ فرید دی کافی ’’ میݙا عشق وی توں ‘‘  ول ول سݨیندے رہیے ۔ ایں موقع تے بھٹو آکھیا جو پٹھاݨے خان ! کوئی خدمت ݙساؤ،  کجھ وی چاہیدے ݙساؤ ۔ پٹھاݨے خان آکھیا جو ’’ سئیں میں اپݨے کیتے کجھ نی منڳدا ، بس میݙے وطن دے غریباں دی پارت ہیوے ، میݙے وسیب دی پارت ہووے ‘‘