اسلام آباد۔10مارچ (اے پی پی) خواجہ غلام فرید چیئر مینجمنٹ کمیٹی اسلامیہ یونیورسٹی بہاول پور دا پہلا اجلاس انجینئر پروفیسر ڈاکٹر اطہر محبوب وائس چانسلر دی صدارت اچ بغدادالجدید کیمپس اچ تھیا۔ اجلاس اچ خواجہ معین الدین محبوب کوریجہ کوں چیئر مین، ڈاکٹر شہزاد قیصر ریٹائرڈ فیڈرل سیکریٹری کوں چیئر مین، پروفیسر ڈاکٹر جاوید حسان چانڈیوڈین فیکلٹی آف آرٹس، سعید شیخ ڈائریکٹر جنرل سائبر ونگ حکومت پاکستان، ریاض حسین سندھڑ اسسٹنٹ پروفیسر، مجاہد جتوئی، ملک خدا یار چنڑ، ڈاکٹر سعدیہ کمال، اطہر لاشاری، عصمت اللہ شاہ،خواجہ راول معین کوریجہ اعزازی ڈائریکٹر/سیکریٹری،میاں صمد شیر عباسی شرکت کیتی۔ انجینئر پروفیسر ڈاکٹر اطہر محبوب آکھیا جو خواجہ غلام فرید چیئر ہک عظیم اتے نیک مقصد سانڳے بݨائی ڳئی اے تانجو ایں عظیم صوفی شاعر دی تعلیمات وݙے پیمانے تے لوکاں تئیں پڄائی ونڄ سڳن۔ ایں مقصد سانڳے منیجمنٹ کمیٹی بݨائی ڳئی اے ۔ اجلاس اچ موجود شرکاء خواجہ غلام فرید چیئر اسلامیہ دے فعال کرݨ دے کم کوں تاریخی موقع قرار ݙتا اتے وائس چانسلر دی کوششاں کوں خراج تحسین پیش کیتا۔ اجلاس اچ طے تھیا جو خواجہ فرید چیئر ملکی اتے غیر ملکی اداریاں نال تعاون اتے سانجھ کریسی اتے خواجہ غلام فرید دی شخصیت اتے تعلیمات دی ساری جہتاں کوں اجاگر کریندیں ہوئیں پرنٹ، الیکٹرانک اتے سوشل میڈیا تے نشر واشاعت کیتی ویسی۔ خواجہ غلام فرید ؒ تے تحقیقی کم اتے ایں بارے انٹرنیشنل جنرل دی اشاعت، انہاں دی شاعری اتے مخطوطات دی معیاری تدوین کیتی ویسی۔ ایں بارے خصوصی میوزیم اتے گیلری وی بݨائی ویسی۔ خواجہ فرید چیئر دے تحت سیمینارز اتے کانفرنسز اچ فریدیات دے ماہرین کوں سݙٰیا ویسی اتے لطیف چیئر، سچل چیئر اتے ٻئی چیئرز نال رابطے ودھائے ویسن۔ خواجہ فرید چیئر لائبریری کوں وی ودھایا ویسی۔
