سرائیکی اجرک محبت،روادری اتے امن دا ݙوجھا ناں اے، ظہوردھریجہ

ملتان ۔6مارچ اے پی پی) سرائیکی کلچر ڈے دے موقع تے شہر اولیا ملتان اچ رنگا رنگ تقریبات کیتی ڳئی۔ ڈھول اتے شہنائی دی دھناں تے سرائیکی جھمر سماں بݨا ڈتا۔ پورے شہر اچ نیلے رنگ دی سرائیکی اجرک دی بہار نکل آئی، ٻال، بڈھڑے، نینگر سارے سرائیکی اجرک کوں گل اچ پاتا ہوئیا ہئی۔ ملتان ٹی ہائوس اچ ’’سرائیکی ثقافت ݙینہ‘‘ دے موضوع تے تقریب تھئی۔ عام شہریاں،دانشوراں، ادیباں،شاعراں اتے مختلف شعبیاں دے نمائندے تقریب اچ شریک تھئیے۔ سرائیکی اجرک دے لباس اچ تریمتیں وی تقریب اچ موجود ہن۔ ایں موقع تے معروف دانشور اتے صحافی ظہور دھریجہ ڳالھ مہاڑ کریندیں ہوئیں آکھیا جو پاکستان مختلف ثقافتاں دا سوہݨا گلدستہ اے۔ زندہ قوماں آپݨی تہذیب اتے ثقافت کوں سینے نال لا تے رکھیندن۔ ظہور دھریجہ آکھیا جو پورے وسیب کوں فخر اے جو وزیراعلیٰ عثمان بزدار دا تعلق ایں خطے توں اے۔ عثمان بزدار ولوں سرائیکی ثقافتی ݙینھ تے مبارک باد دا سنیھا خوش آئند اے۔ انہاں آکھیا جو پی ٹی آئی دی حکومت بݨݨ اچ سرائیکی وسیب دی عوام دا وݙا کردار اے۔ توقع اے جو پی ٹی آئی دی حکومت جنوبی پنجاب صوبے دا وعدہ پورا کریسی۔