اسلام آباد۔17مارچ (اے پی پی)سرائیکی ٻولی دے پہلے ناول نگار ،افسانہ نویس ،ڈرامہ نگاراتے ماہر تعلیم ،،صدارتی ایوارڈ یافتہ ،ادیب ظفر محمود لاشاری اچ محمد ابراہیم خان جیڑھے جو ہک ویٹرنیری ڈاکٹر ہن دے گھر 9 دسمبر 1948 احمد پور شرقیہ دی وستی محراب والہ وچ ڄمے ۔ظفر محمود خاں لاشاری ابتدائی تعلیم احمد پور شرقیہ توں حاصل۔کیتی میٹرک دے بعد چنی گوٹھ وچ بطور پی ٹی سی ٹیچر بھرتی تھیے اتے اپݨی باقی تعلیم وی جاری رکھیونے ۔پرائیٹ طور تے ایم۔اے سرائیکی ایم اے پنجابی اتے ایم۔ایڈ کیتا نال و نال پی ٹی سی ٹیچر توں ترقی کریندے ہوئیں مڈل اسکول دے ہیڈ ماسٹر بݨئے اتے 2008 وچ ریٹائر تھیے ۔سرائیکی زبان و ادب دا پہلا ناول لکھݨ دا اعزاز ظفر لاشاری سئیں دے ناویں ہے ،انہاں دا لکھیا ہویا پہلا ناول نازو 1971 اچ ادبی مجلس بہاولپور دے زیر اہتمام چھپیا ہا۔ جہڑا جو1975توں 1985تئیں پنجاب یونیورسٹی لاہور دے ایم اے پنجابی دے نصاب وچ پڑھایا ویندا رہیے۔ ظفر لاشاری سئیں دا ݙوجھا ناول پہاج 1987اچ پنجابی بورڈ دے زیر اہتمام چھاپیا ڳیا اتے ایں ناول دا ادھا حصہ بی اے سرائیکی دے نصاب وچ وی شامل ہے بلکہ مکمل ناول اسلامیہ یونیورسٹی بہاولپور دے ایم اے دے نصاب وچ شامل ہے۔ انہاں دا ناول پہاج 1974 توں 1980 تئیں ماہنامہ سرائیکی ادب ملتان توں چالھی قسطاں وچ چھپ دا ریہا۔ انہاں دے افسانیں دا مجموعہ تتیاں چھاواں دے ناں نال وی ہے اتے ایندے نال جڳ مشہور شاعر جانباز جتوئی دی شخصیت تے ہک کتاب جانباز جتوئی حیاتی تے فن لکھی ۔ظفر محمود لاشاری پنجاب یونیورسٹی لاہور دے زیر اہتمام ایم ایڈ کیتے جیہڑا مقالہ لکھیا جییڑھا جو پنجابی ادبی بورڈ خواجہ فرید دے تعلیمی نظریات دے ناں نال چھپیا۔ انہاں سرائیکی لوک سہرے جیں وچ صدیاں پراݨے لوک سہرے شل کیتے ڳئے ہن جیں کو اسلام آباد توں نہ صرف چھپی بلکہ اے کتاب وی اسلامیہ یونیورسٹی بہاولپور دے ایم۔اے سرائیکی دے نصاب وچ شامل کیتی ڳئی انہاں اسٹیج ڈرامے وی لکھئیے۔ایں ڳالھ وچ کوئی شک کینی جو سئیں ظفر لاشاری سرائیکی وسیب دا ہک ٻہوں وݙا ناں اے دبستان ادب دا روشن ستارہ ہن ڳزریل سالھ ،16 مارچ 2020دے اڄوکے ݙیہنہ وار او ایں فانی جہان توں جھوک لݙا ڳئے اتے سڄوکے وسیب تے علم و ادب دی دنیا وچ مونجھ ولیٹ ڳئی سرائیکی عوامی تریمت تحریک اپݨے مہاندریں کوں یاد کریندیے ہوئیں ادا اطہر لاشاری اتے وسیب واسیں توں ارمانی ہن اللہ پاک انھاں دے درجات اچے کرےجنت وچ جاہ ݙیوے آمین۔
