اسلام آباد۔19مارچ (اے پی پی):پاکستان سرائیکی پارٹی دی چیئرپرسن ڈاکٹر نخبہ تاج لنگاہ کراچی دا ترائے ݙینھ دا دورہ کرتے واپس ملتان پڄ ڳئن ۔کراچی اچ انہاں پارٹی دے صوبائی صدر سید شفقت بخاری ایڈووکیٹ دے پتر دی شادی اچ شرکت کیتی جیں اچ کراچی دے قوم پرستاں اتے وکلاء شرکت کیتی۔ بعداچ پاکستان سرائیکی پارٹی کراچی شہر دے صدر قاری اللہ بخش طاہر ولوں منعقدہ پاکستان سرائیکی پارٹی کراچی دے ورکراں اتے عہدیداراں دی تربیتی نشست توں خطاب کریندے ہوئیں انہاں آکھیے جو پاکستان سرائیکی پارٹی سرائیکی عوام دے حقوق دی پہلی رجسٹرڈ سیاسی جماعت اے جیں کوں بانی بیرسٹر تاج محمد خاں لنگاہ سیاسی نظریہ ضرورت دے تحت بݨائی کیوں جو تاج محمد خاں لنگاہ جݙاں سرائیکی قومی حقوق دی ڳال کیتی تاں اوں ویلھے دے وزیر اعظم ذوالفقار علی بھٹو دے سامݨے رکھی تاں تاج محمد خاں لنگاہ دے پیپلزپارٹی دے نال سیاسی اختلاف شروع تھی ڳئے ایندے تے بیرسٹر تاج محمد خاں لنگاہ 1970 دی دہائی اچ ݙوجھے سرائیکی عمائدین دے نال رل تے ملتان اچ پہلی سرائیکی ادبی کانفرنس سݙی جیں اچ سرائیکی وسیب سودھے سندھ دے سینئر سیاسی رہنماواں شرکت کیتی۔ بعدازاں 1984 اچ سرائیکی صوبہ محاذ دا قیام عمل اچ گھن آیا ڳیا جیں اچ سرائیکی وسیب دے دانشوراں ادیباں اتے لکھاریاں سرائیکی قوم دی ترجمانی کیتی۔ 1989 اچ پاکستان سرائیکی پارٹی دا قیام عمل اچ گھن آیا ڳیا ۔ ایں موقع تے پارٹی دے صوبائی صدر سید شفقت بخاری ایڈووکیٹ، اسحاق خان بلوچ۔ عباس ݙاہا۔اسماعیل بلوچ اتے ٻئے رہنماء موجود ہن بعداچ سرائیکی قومی اتحاد دے چیئرمین ریٹائرڈ کرنل عبدالجبار عباسی ڈاکٹر نخبہ تاج لنگاہ نال ملاقات کیتی تے ݙوہیں رہنماواں سرائیکی وسیب دی مجموعی صورتحال تے ڳال مھاڑ کیتے اتے سرائیکستان صوبہ دی تحریک کوں تکھا کرݨ تے ٻئے امور تے ڳال مہاڑ کیتی ڳئی ۔
