اسلام آباد۔3مارچ (اے پی پی) وفاقی وزارت خزانہ یکم مارچ 2021 توں گریڈ ہک توں گریڈ 19 تئیں دے وفاقی ملازماں دی بنیادی تنخواہیں اچ 25 فیصد تخفیف تفاوت الائونس دا آفس میمورنڈم جاری کر ڈتے۔ وزارت خزانہ دے ریگولیشن ونگ ولوں جاری دفتری یادداشت دے مطابق 25 فیصد تخفیف تفاوت الائونس دا اطلاق انہاں ملازماں تے کائنا ہوسی جیڑھے جو پہلے ودھیکی الائونس یا بنیادی تنخواہ دے 100 فیصد مساوی یا اوں توں ودھ الائونس گھندے پئن۔ 25 فیصد تخفیف تفاوت الائونس 2017 دی بنیادی تنخواہ دے سکیل دے مطابق ہوسی۔ یادداشت دے مطابق الائونس دا اطلاق گریڈ ہک توں گریڈ 19 تئیں دے سارے سرکاری ملازماں بشمول وفاقی سیکرٹریٹ اتے ملحقہ محکمیاں تے ہوسی۔ یادداشت دے مطابق 58 ادایاں اتے محکمیاں دے ملازماں تے ایں الائونس دا اطلاق کائنا ہوسی کیونجو او پہلے توں ودھیکی الائونس یا بنیادی تنخواہ دے برابر یا اوں توں ودھ الائونس گھندے پئن۔
