اسلام آباد۔21اپریل (اے پی پی)

رپورٹ: امتیاز احمد

مذہبی سیاحت عالمی سطح تے معیشت دی ترقی سانڳے ہک اہم حیثیت اختیار کر ڳئی اے۔ پوری دنیا اچ مختلف مذاہب دے منݨ آلے لکھاں لوک مذہبی فریضے سانڳے اتے روحانی سکون سانڳے ہر سال مقدس جہیں آلے پاسے سفر کریندن۔ ہر سال تقریباٍ 300 توں 330 ملین سیاح دنیا اچ مختلف مذہبی جہیں تے ویندن جیڑھے جو ارباں ڈالر دے زرمبادلہ پیدا کرݨ دا زریعہ ہن۔ پاکستان دنیا دی مختلف قدیم تہذیباں رکھیندے اتے ہک ایجھے خطے اچ واقع اے جیڑھا جو دنیا دے ترائے وݙے مذہب، ہندومت، بدھ مت اتے سکھ مت دے پیروکاراں دے ہزاراں سال قدیم تاریخی اتے مذہبی جہیں دی ہک وݙی تعداد توں مالامال اے۔ پر ایندے باوجود پاکستان دا سیاحت دا شعبہ بھارت،ترکی،سری لنکا اتے خطے دے ݙوجھے ملکاں توں ٻہوں پچھوں اے جئیں دی اہم وجہ سکیورٹی دے مسئلے، فنڈز دی گھٹکی، توجہ نہ ہووݨ اتے ٻئے کئی مسئلے ہن۔ اڄوکی حکومت دے ٹھوس عملی اقدامات نال پاکستان مستحکم رفتار نال سیاحت دے محاذ تے ترقی کریندا پئے جئیں دی ہک مثال کرتار پور راہداری منصوبہ اے جئیں دے بݨݨ نال نہ صرف سکھ برادری دے دل جت ڳھدن بلکہ پاکستان اچ مذہبی سیاحت دی ترقی دی نویں راہواں کھول ݙتن۔

وزیر اعظم عمران خان 2018 اچ اقتدار سنبھالݨ دے بعد ای ملک دی معیشت کوں تقویت ݙیوݨ اتے دنیا اچ پاکستان دے امیج کوں بہتر کرݨ سانڳے مذہبی سیاحت کوں ودھاوݨ دی لوڑھ تے زور ݙتے۔ سری لنکا دے اڄوکے سرکاری دورے اچ وزیراعظم عمران خان سری لنکن بدھ مت آثار اتے مذہبی جھیں ݙٹھن۔ وزیر اعظم عمران خان دی خصوصی دعوت اتے سری لنکا اچ پاکستانی ہائی کمیشن دی معاونت نال 19 اپریل 2021 توں بدھ مت مذہب نال تعلق رکھݨ آلے مذہبی پیشوا پاکستان دے دورے تے آئے ہوئن۔ اے بدھ بھکشو آپݨے ہفتے دے دورے اچ بدھ جھیں اتے عجائب گھراں دا دورہ کریسن۔ بدھ مت وفد دی سربراہی ڈاکٹر والپول پیانند تھیرو کریندے پئن۔ اے وفد آپݨے فورے اچ لاہور دے علاوہ اسلام آباد، ٹیکسلا، شہباز گڑھی، تخت بھائی اتے جہان آباد (سوات) ویسن۔

بدھ مذہبی پیشواؤاں دا اے وفد وزارت مذہبی امور اتے بین المذاہب ہم آہنگی دے عہدیداراں نال وی ملاقاتاں کریسی اتے وفاقی دارالحکومت اچ آپݨے دورے اچ صدر مملکت ڈاکٹر عارف علوی اتے وزیر اعظم عمران خان نال وی ملاقات کریندا پئے۔

سری لنکا دے دارالحکومت کولمبو اچ پاکستانی ہائی کمیشن دی سیکنڈ سیکرٹری عائشہ ابوبکر فہد ݙسیا جو دنیا اچ ٻہوں سارے لوک نی جاݨدے جو پاکستان گندھارا دی شاندار تہذیب اتے بدھ تہذیب دا گھر اے۔

ڈاکٹر وال پیول پیانند تھیرو آکھیا جو اساکوں اے ݙکھ تے ٻہوں خوشی تھئی اے جو اگرچہ پاکستان لوک بدھ مت دے پیروکار تاں کائنی پر ایندے باوجود انہاں مہاتما بدھ دے مجسمے، بدھ مت آرٹ اتے بدھ مت دے تاریخی ورثے اتے فن تعمیر کوں سانبھیا ہوئے۔ انہاں آکھیا جو پاکستانی وزیر اعظم عمران خان سری لنکا اچ ہک عظیم کرکٹر اتے اعتدال پسند سیاستدان دی حیثیت نال سنڄاݨیے ویندن، سری لنکن انہاں دا ٻہوں احترام کریندن۔ وفد دے رکن ادوے دھملوکا تھیرو آکھیا جو بدھ مت اتے گندھارا تہذیب دی تاریخ ہزاراں سالاں تے محیط اے۔

ڈاکٹر اسیلا وکرماسنگھی جیڑھے جو سری لنکا اتے مالدیپ بارے سری لنکا دے صدر دی سینئر سیاسی مشیر ہن، ڳالھ مہاڑ کریندیں ہوئیں آکھیا جو اڄوکی حکومت پاکستان ولوں بدھ مت تہذیب دے مقدس جہیں کوں جیڑھے جو ماضی اچ بند کر ݙتے ڳئے ہن کوں ولا سیاحواں سانڳے کھولݨ ہک چنگا کم اے۔ انہاں آکھیا جو اے پاکستانی قوم دی ٻہوں وݙی خوشقسمی اے جو انہاں کوں عمران خان جیہا دور اندیش وزیراعظم اتے لیڈر ملیے۔

لاہور میوزیم دے ڈائریکٹر اعجاز احمد منہاس دورے دے موقع تے آکھیا جو وفد اچ شامل بدھ بھکشو آپݨے شاندار ماضی دے آثار اتے مذہبی جھیں کوں ݙیکھݨ سانڳے پاکستان آوݨ تے ٻہوں خوش ہن۔ انہاں آکھیا جو وفد اچ شامل ہک بدھ پیشوا وزیراعظم عمران خان دا شکریہ ادا کریندیں ہوئیں آکھیا جو جیڑھی مقدس آثار اتے جھیں بارے اساں صرف تاریخ دی کتاباں اچ پڑھدے ہاسے اڄ انہاں کوں آپݨی اکھیں نال ݙیکھݨ دا موقع ملیے جئیں تے اساں پاکستانی حکومت اتے خصوصی طور وزیراعظم عمران خان دا شکریہ ادا کریندوں۔