اسلام آباد۔11مئی(اے پی پی)وزیر خارجہ مخدوم شاہ محمود قریشی آکھیے جو پاکستان بھارت نال مذاکرات کوں تیار اے، بھارت کشمیریاں دا تشخص مٹاوݨ دیاں حرکتاں بند کرتے مذاکرات دو آوے، فلسطین دی صورتحال تے چنتا اے، افغان امن کیتے کوششاں جاری ہین، وزیر اعظم دا سعودی عرب دا دورہ غیرمعمولی ہا۔ وزارتِ خارجہ اچ پریس کانفرنس کریندے انہاں آکھیا جو قبلہ ء اول مسجد اقصٰی اچ بربریت تے پاکستان کوں چنتا اے جیندے تے وزیر اعظم عمران خان سعودی عرب اچ سیکرٹری جنرل او آئی سی نال ملݨ ویلھے ڳالھ کیتی اے، ایندے تے ترک وزیر خارجہ وی سعودی حکام نال الیسن، پاکستان اسرائیل ولوں مظلوم فلسطینیاں تے حملے دی مذمت کریندے، اساں ایندے تے جرمنی ایران، اردن اتے ٻہوں سارے ملکاں نال الائے۔ حالات سدھارݨ کیتے اقوام متحدہ دی سلامتی کونسل دا اجلاس سݙݨا چاہیدے۔ انہاں آکھیا جو دورہ سعودی عرب اچ پاک سعودی عرب ادارہ جاتی میکنزم تشکیل ݙتا ڳئے جیندے اچ دفاع وسلامتی،معیشت اتے ثقافت کوں ترجیح ݙتی ویسی، پاکستان سعودی عرب اچ ہمر منداں دی لوڑھ پوری کرݨ کیتے پہلے توں تیاری کریسی تاں جو پاکستانیاں کوں ودھ روزگار ملے۔ وزیر خارجہ آکھیے جو اساں امن اتے استحکام کیتے افغانستان دے نال ہیں جو مذاکرات نال معاملات طے تھی ونڄن۔انہاں آکھیا جو سفارتخانیاں دی کارکردگی چنڳی کرݨ کیتے حکمت عملی تے کم کریندے پئے ہیں، ایں سانڳے جامع تحقیقات تھینداں پین۔
