وزیراعظم دے دورہ سعودی عرب نال مخالفین دیاں امیداں تے پاݨی پھر ڳئے، وزیرخارجہ شاہ محمودقریشی

ملتان۔12مئی(اے پی پی)وزیرخارجہ مخدوم شاہ محمودقریشیآکھیے جو وزیراعظم دے دورہ سعودی عرب نال مخالفین دیاں امیداں تے پاݨی پھر ڳئے، کڄھ عناصر سعودی عرب نال تعلقات خراب کرݨ چاہندن بھل انہاں دے ارمان دل اچ ہی رہ ڳین۔ ملتان اچ میݙیا نال الیندے انہاں آکھیا جو سعودی ولی عہد محمد بن سلمان دی دعوت تے اے دورہ کیتا ہا جیندے اچ وݙیاں کامیابیاں ملین، سعودی عرب نال پنج معاہدے تھین، سعودی پاکستان اسٹریٹجک سپریم کونسل بݨائی ڳئی اے جیندے نال آپسی تعلقات ٻئے تکڑے کرݨ کیتے طریقہ کار طے کیتا ویسی، سعودی عرب توانائی دے شعبے اچ پاکستان دا ہتھ ونݙیسی، سعودی وزیر خارجہ ݙو ݙینھ دے دورے تے پاکستان آسن۔ انہاں اکھیے جو وزیراعظم عمران خان او آئی سی دے سیکٹری جنرل کوں مسلہ فلسطین بارے اپݨا چنتا ݙسائے، جیکر سارے مسلم ملک ایندے تے اڳو تے آون تاں ٻہوں فرق پوسی۔ شاہ محمود قریشی آکھیا جو جنوبی پنجاب سیکرٹریٹ بݨݨ وݙی کامیابی اے، وزیراعظم ملتان ضلع کیتے 30 ارب دے پیکج دا اعلان کیتے، ویلھا لڳسی بھل جنوبی پنجاب اچ تبدیلی وی آسی۔ انہاں آکھیے جو حکومت سودھا سارے اداریاں کوں کرپشن دے خلاف اپݨا کردارادا کرݨا چاہیدے، شہبازشریف ہی نوازشریف دے ڳارنٹر ہین جیکر اوہے ٻاھرو لڳے ڳئے تاں مک مکا دا الزام لڳسی بھل ساݙی حکومت کہیں نال مک مکا نہ کریسی۔