اسلام آباد۔17مئی (اے پی پی):وفاقی وزیر ہوا بازی غلام سرور خان آکھیے جو راولپنڈی رنگ روڈ منصوبہ تربیلا اتے منگلا ڈیم وانڳوں اہم قومی منصوبہ اے، ماضی دیاں حکومتاں ایں اہم قومی منصوبہ کوں نظر انداز کیتا، موجودہ حکومت منصوبہ دی اہمیت دے پیش نظر اینکوں ترجیحی بنیاداں تے تعمیر کرݨ دا عزم رکھیندی اے ، منصوبہ دی الائنمنٹ اچ تبدیلی کہیں سیاسی مفاد کیتے کائنی بلکہ تکنیکی بنیاداں تے ماہرین تجویز کیتی، ہݨ ھک متنازعہ رپورٹ دی بنیاد تے منصوبہ کوں روکݨ دی کوشش کیتی ڳئی اے جیں تے وفاقی کابینہ اچ وی آواز چیساں ۔اے ڳالھ انہاں سنوار کوں پریس انفارمیشن ڈیپارٹمنٹ اچ پریس کانفرنس توں خطاب کریندے ہوئیں آکھی اے ۔وفاقی وزیر آکھیے جو میں اے ڳالھ واضح کرݨ چاہنداں جو ایں منصوبے دی الائنمنٹ تے جیڑھا شور تھئے اتے جیڑھی انکوائری کمیٹی تشکیل ݙتی ڳئی ایندی سربراہی کمشنر راولپنڈی کریندے پئے ہن جݙاں جو ڈپٹی کمشنر اتے ایڈیشنل ڈپٹی کمشنر راولپنڈی ایندے ارکان ہن جݙاں جو ہک رکن انہاں ایندے اچ رلاوݨاں ہئی ،ایں انکوائری کمیٹی دی جیڑھی رپورٹ مرتب کیتی ڳئی ایندے تے اراکین دستخط نی کیتے صرف کنوینئر دستخط کرتے اے رپورٹ بھیج ݙتی جیں تے وزیراعلیٰ ولوں نوٹس ڳھدا ڳئے ۔انہاں آکھیے جو ڈپٹی کمشنر اتے ایڈیشنل ڈپٹی کمشنر راولپنڈی ایماندار افسران ہن ۔ انہاں اختلافی نوٹ تحریر کیتے لیکن رپورٹ دی توثیق نی کیتی جیں دی بنیاد تے میں سمجھداں جو اے رپورٹ متنازعہ تھی ڳئی اتے ایندی کوئی اہمیت کائنی اے معاملہ وفاقی کابینہ دے اجلاس اچ وی چیساں ۔انہاں آکھیے جو اعلیٰ سطح دی انکوائری کمیٹی ول بݨاوݨ دی لوڑھ اے جو انہاں حقائق کوں سامݨے گھن آیا ونڄ سڳے جیڑھے ایں اہم منصوبے دے رستے اچ رکاوٹ بݨدے پئن ۔انہاں آکھیے جو میں تے میݙا خاندان پنج دہائیاں توں سیاست کوں خدمت سمجھ تے کریندے پن اتے سیاست کوں اپݨی شناخت دا ذریعہ نی بݨایا ، منصوبے دے آغاز توں اختتام تئیں میݙا ، میݙے بھرا، میرے پتر، میݙے بھتریجے یا خاندان دے کہیں ھک بندے دی کوئی ھک انچ وی زمین ایں منصوبے اچ نی آندی جے کوئی ثابت کرݙیوے تاں میں سیاست چھوڑ ݙیساں۔ انہاں آکھیے جو ھک ٹی وی پروگرام اچ عطاء تارڑ ولوں ودھ چڑھ تے الزام لاتے ڳئن ،انہاں دے خلاف ہتک عزت دا دعویٰ کرݨ دا حق رکھینداں ۔میݙے علاوہ زلفی بخاری دا وی ناں ڳھدا ڳئے ۔انہاں آکھیے جو واضح کرݨ چاہنداں جو منصوبہ دی الائنمنٹ توں کہیں سیاسی شخصیت دا کوئی تعلق کائنی۔ نووا ہائوسنگ سوسائٹی دے حوالے نال انہاں وضاحت کیتی جو ایں سوسائٹی نال وی میݙا کوئی تعلق کائنی نہ میں تے میݙے خاندان ایں پراجیکٹ کیتے کوئی زمین ڳھدی تے نہ کوئی زمین موجود اے۔ھک سوال دے ولدے اچ انہاں آکھیے جو انکوائری کمیٹی ہووے یا انکوائری رپورٹ ایندے اچ میݙا ناں کتھائیں وی کائی ۔انہاں آکھیے جو نووا دے سول ایوی ایشن ولوں این او سی دا ذکر آیا لیکن یہ وضاحت کرݨ چاہنداں جو ایں این او سی کوں وی ہائیٹ کلیئرنس کیتے جاری کیتا ڳیا ، ایندا رنگ روڈ یا ݙوجھے کہیں تکنیکی معاملے نال کوئی تعلق کائنی ۔ وفاقی وزیر آکھیے جو ایں معاملے دی انکوائری نیب یا کوئی ݙوجھا ادارہ کرے ایندا خیرمقدم کریسوں، مخالفین وانڳوں نیب انکوائری تے شور نہ کریسوں ۔انہاں آکھیے جو موجودہ اپوزیشن پیپلز پارٹی اتے پی ایم ایل (این) ترائے ترائے واری اقتدار اچ رہیے لیکن منصوبے کوں توڑ نی پجا سڳیے، جتنے وی موٹرویز اتے جی ٹی روڈ دے منصوبے ݙیکھو انہاں دے نال رنگ روڈ یا بائی پاس موجود ہوندن لیکن پنڈی دا رنگ روڈ کائنی بݨ سڳیا جیڑھا جو ھک سوالیہ نشان اے اتے اساݙی حکومت دی سوچ تے وژن ہئی جو اے منصوبہ اساں بݨاوݨاں اے ۔کہیں کوں وزارت ݙیوݨ یا گھنݨ وزیراعظم دی صوابدید ہوندی اے ، کپتان کہیں وی کھلاڑی کوں جتھاں کھݙاوے اتھاں کھݙا سڳدے جے کوئی سکینڈل ہوندا تاں وزارت تبدیل نہ تھیندی بلکہ گھر بھیج ݙتا ویندا ۔انہاں آکھیے اے منصوبہ بھلے 2017ء دی الائنمنٹ تے تعمیر تھیوے یا نویں الائنمنٹ تے، اے منصوبہ بݨاوݨ ناگزیر اے۔
