اسلام آباد۔28جولائی(اے پی پی)صدر مملکت ڈاکٹر عارف علوی انسانی معاشرے دی بہتری کیتے تعلیم دے نال نال تربیت دی اہمیت ݙسیندے آکھیے جو علم دے نال نال معاشرے دا درد محسوس کرݨ اتے انکساری وی ضروری اے، پورے ڄڳ اچ علم آلی معیشت دا دور آندا پئے، ملک اچ معاشی سرگرمیاں ودھدیاں پین، نالج اکانومی دی بنیاد تےملک تیزی نال ترقی کریسی، معاشرے توں بدعنوانی مکاوݨ ٻہوݨ ضروری تھی ڳئے۔ اے ڳالھ انہاں ایوان صدر اسلام آباد اچ غلام اسحٰق خان انسٹیٹیوٹ دے 25ویں کانووکیشن دی تقریب نال خطاب کریندے آکھی۔ غلام اسحٰق خان انسٹیٹیوٹ دے ریکٹر امین اللّہ خان، ای ڈی شکیل درانی اتے پروفیسر وسیم احمد خان وی خطاب کیتے۔ صدر مملکت گریجویٹ طلباء، انہاں دے والدین اتے اساتذہ کوں وی مبارکباد ݙتی۔ انہاں آکھیا جو علم دی کوئی حد کائنی، نواجواناں کوں ایں رستے تے ٹردے ہوئے علم دی ودھ سک رکھݨی چاہیدی اے۔
