اسلام آباد ۔ 13 جولائی (اے پی پی) وزیراعظم محمد نواز شریف آکھیا اے جو مسئلہ کشمیر داحل اقوام متحدہ سلامتی کونسل دیان قرارداداں دے مطابق جموں تے کشمیر دے عوام کوں حق خودارادیت دے ذریعے ای ممکن ہے۔ پاکستان دی حکومت اتے عوام اپنڑے کشمیری بھراواں دے جذبات دا احترام کریندے ہن اتے بین الاقوامی فورماں تے کشمیر کاز دی حمایت ہر قیمت تے جاری رکھیسن۔ انہاں ایہ گالھ کشمیر بارے پارلیمان دی خصوصی کمیٹی دے چیئرمین اتے جمعیت علماءاسلام (ف) دے امیر مولانا فضل الرحمن نال بدھ کوں لہور وچ تھیونڑ آلی ملاقات وچ آکھی۔ مولانا فضل الرحمن وزیراعظم دی صحت بارے وچ دریافت کیتا اتے انہاں وختی صحت یابی سانگے نیک خواہشات دا اظہار کیتا۔ ملاقات دے دوران قومی اہمیت دے امور تے خیالیں د اتبادلہ کیتا گیا۔ جے یو آئی (ف) دے سربراہ وزیراعظم کوں جموں و کشمیر وچ بھارتی ملٹری اتے پیراملٹری فورسز ولوں انسانی حقوق دیاںخلاف ورزیاں دے حوالے نال کشمیری قیادت دے نال اپنڑی حالیہ گالھ مہاڑ بارے وچ آگاہ کیتا۔ ملاقات وچ بھارتی فوج دے ہتھوں کشمیری رہنما برہان وانی اتے بئے کئی شہریاں دی شہادت دے واقعات دی مذمت دا اعادہ کیتا گیا۔ مولانا فضل الرحمن کشمیری قیادت اتے پاکستان دی عوام دے جذبات دا اظہار کریندے ہوئیں آکھیا جو کشمیری قیادت مشکل ویلھے وچ پاکستان ول ڈیکھدی پئی ہے۔ وزیراعظم نواز شریف آکھیا جو پاکستان دی حکومت اتے عوام اپنڑے کشمیری بھینڑ بھراواں دے جذبات دا احترام کریندے ہن اتے ا وہ خواہ کجھ وی ہوئے ، ہر بین الاقوامی فورم تے کشمیر نصب العین دی حمایت جاری رکھیسن۔ وزیراعظم آکھیا جو مقبوضہ کشمیر دی عوام دی آواز ااتے جدوجہد کوں وحشیانہ طاقت اتے انسانی حقوق دیاںخلاف ورزیاں دے ذریعے دبایا نی ونج جا سگدا۔ انہاں آکھیا جو کابینہ دے خصوصی اجلاس دا مقصد جموں و کشمیر دے بے گناہ شہریاں دے خلاف بھارتی سیکیورٹی فورسز دے استبدادی اقدامات دی بناءتے مقبوضہ کشمیر وچ تریکھے وگڑدی ہوئی صورتحال دے تناظر وچ مقبوضہ کشمیر دی قیادت اتے عوام دی حمایت سانگے آئندہ دا طریق کار واضع کرنڑ ہے۔ وزیراعظم آکھیا جو اقوام متحدہ دے تحت ہک منصفانہ اتے غیرجانبدارانہ استصواب رائے دے ذریعے سلامتی کونسل دی قرارداداں دے مطابق جموں و کشمیر دی عوام کوں انہاں دا حق خودارادیت دے تے ای جموں و کشمیر دے تنازعہ دا حل ممکن ہے۔ ملاقات وچ وزیراعلیٰ پنجاب محمد شہباز شریف، وزیر داخلہ چوہدری نثار علی خان اتے وفاقی وزیر اکرم درانی وی موجود ہن۔
