واشنگٹن ۔ 15 جولائی (اے پی پی) امریکی صدر براک اوباما فرانسیسی شہر نِیس وچ تھیونڑآلے حملے دی سخت مذمت کریندے ہوئیں ایکوں خوفناک دہشت گردانہ حملہ قرار ڈتا ہے۔ جرمن ذرائع ابلاغ دے مطابق براک اوباما 84 بندیاں دی ہلاکت دی وجہ بنڑن آلے ایں واقعے دی تحقیقات سانگے فرانس کوں مدد دی پیشکش وی کیتی ہے۔ امریکی صدر دا آکھنڑ ہا جو امریکی عوام ولوں اوہ فرانس وچ خوفناک دہشت گردانہ حملے دے ایں واقعے دی سخت الفاظ وچ مذمت کریندے ہن جیندے نتیجے وچ درجناں بندے ہلاک اتے زخمی تھئے ہن۔ انہاں دا آکھنڑ ہا جو ایں حملے دے تناظر وچ ا وہ اپنڑے سبھ توں پرانڑے اتحادی فرانس دے نال رل تے کھڑے ہن۔
