گزریل مالی سال دے دوران تیل دیاں درآمدات تے 4.5 ارب ڈالر دی بچت تھئی، حکومت غیر ملکی قرضیاں دی مد وچ 5.3 ارب ڈالر دیاں ادائیگیاں کیتیاں، سٹیٹ بینک

اسلام آباد ۔ 26 اگست (اے پی پی) گزریل مالی سال 2015-16 ءدے دوران تیل دیاں درآمدات تے حکومت کوں 4.5 ارب ڈالر دی بچت تھئی ہے جڈانجو مالی سال وچ حکومت غیر ملکی قرضیاں دی مد وچ 5.3 ارب ڈالر دیاں ادائیگیاں کیتیاں ہن۔ سٹیٹ بینک آف پاکستان د ی رپورٹ دے مطابق گزریل مالی سال 2014-15 ءدے دوران قرضیاں دی مد وچ5.417 ارب ڈالر دیاں ادائیگیاں کیتیاں گئیاں ہن۔ ایں طرح گزریل مالی سال دے دوران غیر ملکی قرضیاں دی ادائیگی دے حوالے نال حکومت کوں تقریباً 117 ملین ڈالر دی بچت تھئی ہے جیندے نال قومی خزانے تے پونڑ آلے بھار گھٹ کرنڑ وچ مدد ملی ہے۔ رپورٹ دے مطابق گزریل مالی سال 2015-16 ءدے دوران غیر ملکی قرضیاں تے سودبھرنڑ دی مد وچ 1.339 ارب ڈالر ادا کیتے گئے ہن جڈانجو اصل قرضیاں دی واپسی دی مد وچ 3.971 ارب ڈالر دیاں ادائیگیاں کیتیاں گئیاں ہن ۔ رپورٹ دے مطابق مالی سال 2014-15 ءدے دوران حکومت قرضیاں تے واجب الادا سود دی مد وچ 1.173 ارب ڈالر جڈانجو اصل قرضیاں دی واپسی دی مد وچ 4.244 ارب ڈالر بھرے ہن۔ سٹیٹ بینک دے مطابق گزریل مالی سال دے دوران باہرلے ملک رہونڑ آلے پاکستانیاں ولوں 20 ارب ڈالر توں ودھ دیاں ترسیلات زر کیتیاں گئیاں ہن جڈانجو عالمی منڈی وچ تیل دیاںقیمتاں وچ ہونڑ آلی گھٹکی نال وی حکومت کو ں4.5 ارب ڈالر دی بچت تھئی ہے۔ رپورٹ دے مطابق گزریل مالی سال دے دوران عالمی مارکیٹ وچ تیل دیاں قیمتاں100 ڈالر فی بیرل توں 42 توں 45 ڈالر فی بیرل تئیں گھٹ تھئیاں ہن جیندے نال درآمدات دی وجہ توں قومی خزانے تے پوونڑآلے بھار وچ وی نمایاں گھٹکی تھئی ہے۔