فیس بک دے بانی مارک زکربرگ دا طبی شعبے وچ تحقیق سانگے 3 ارب ڈالر امداد ڈیونڑ دا اعلان

واشنگٹن ۔ 22 ستمبر (اے پی پی) سماجی رابطیاں دی ویب سائٹ فیس بک دے بانی مارک زکربرگ اتے انہاں دی گھر آلی پریسیلا چن آوندے 10 سال دے دوران طبی شعبے وچ تحقیق سانگے 3 ارب ڈالر امداد ڈیونڑدا اعلان کیتا ہے۔ میڈیا رپورٹس دے مطابق سان فرانسسکو وچ پریس کانفرنس نال خطاب کریندے ہوئیں مارک زکربرگ دی اہلیہ آکھیا جو انہاں دا مقصد جاری صدی دے چھیکڑ تئیں ساریں بیماریاں دا علاج، انہاں توں بچنڑ اتے کنٹرول کرنڑ سانگے اقدامات کرنے ہن جڈانجوا یہ فنڈز چن زکربرگ نامی ادارے ولوں تقسیم تھیسن جیندی بنیاد مسٹر اینڈ مسز زکربرگ دسمبر 2015 وچ رکھی ہائی۔ بئے پاسے گوگل دا ہک یونٹ این ایچ ایس دے نال رل مل تے کمپیوٹر دے ذریعے مرضاں دی تشخیص ہور چنگی کرنڑ سانگے کوشاں ہے۔ مسز چن زکربرگ دا آکھنڑ ہا جو اوہ پہلے ہی ریسرچ سینٹر ”بائیو ہب” سانگے 60 ملین ڈیونڑ داوعدہ کر چکی ہن۔ انھاں آکھیا جو بائیو حب شروع وچ ڈو منصوبیاں تے کم کریسی جیندے وچ پہلا منصوبہ جسم دے اہم اعضا کو ںکنٹرول کرنڑ آلے خلیاں دے بارے وچ جانڑن اتے ڈوجھا ایچ آئی وی، ایڈز، ایبولا اتے ذیکا وائرس اتے بئیاں نویاں مرضاں دے علاج سانگے نویں ٹیسٹ اتے ویکسین بناونڑ سانگے ہوسی۔ یاد رہوے جو زکربرگ اتے انہاں دی گھر آلی پریسیلا چن اپنڑی دھی دے جمنڑتے کمپنی وچ اپنڑے 99 فیصد شیئرز فلاحی کماں سانگے عطیہ کرنڑ دا اعلان کیتا ہا جیندی مالیت 45 ارب ڈالر ڈسائی گئی ہے۔