پاک چین اقتصادی راہداری نال ملک اتے خطے وچ خوشحالی اتے ترقی آوسی،پاکستان وچ بینکاری دا شعبہ متاثر کن سالانہ اوسط شرح نمو دے نال ترقی کریندا پئے وزیراعظم محمد نواز شریف دی بینک آف چائنا دے بورڈ آف ڈائریکٹرز دے چیئرمین نال ملاقات وچ گالھ مہاڑ پاکستان دا مالیاتی شعبہ عالمی سرمایہ کاراں سانگے بے شمار مواقع پیش کریندا ہے، تیان گولی

اسلام آباد ۔ 19 اکتوبر (اے پی پی) وزیراعظم محمد نواز شریف آکھیا ہے جو پاک چین اقتصادی راہداری ڈھگ سارے ترقیاتی منصوبیاں دا مجموعہ ہے جیندے نال ملک اتے خطے وچ خوشحالی اتے ترقی آوسی۔ انہاں ایہ گالھ بینک آف چائنا دے بورڈ آف ڈائریکٹرز دے چیئرمین تیان گولی نال بدھ دی سویل ایوان وزیراعظم وچ گالھ مہاڑکریندے ہوئیں آکھی۔ وزیراعظم آکھیا جو پاک چین سدا بہار تعلقات سانجھے اصولاں اتے مفادات تے مبنی ہن جیرھے مختلف شعبیاں وچ تعاون دی بنیاد استوار کریندے ہن۔ سیکورٹی ، تجارت اتے بنیادی ڈھانچے دی ترقی وچ پاکستان سانگے چین دی بھرپور حمایت کوں اجاگر کریندے ہوئیںوزیراعظم آکھیا جوپاکستان اتے چین سانجھے مستقبل دے حامل ہن اتے پاک چین اقتصادی راہداری کہیں وی باہرلے ملک دے نال سبھ توں وڈا اتے جامع منصوبہ ہے۔ انہاں آکھیا جو پاکستان وچ ہک متحرک بینکاری نظام پاتا ویندا ہے جیں نے منافع دی اچی شرح، چنگی لیکوڈیٹی اتے مضبوط ساکھ پاتی ہے۔ بینکاری دا شعبہ گزریل پنج سالاں توں متاثر کن سالانہ اوسط شرح نمو دے نال ترقی کریندا پئے۔ وزیراعظم آکھیا جو مضبوط سرمایہ جاتی بنیاد، اثاثہ جات اتے منافع پذیری وچ چنگی نمو اتے بین الاقوامی معیاراں دی پیروی پاکستان دے بینکاری دے شعبے کوں سرمایہ کاراں سانگے خطے وچ بہوں مسابقانہ حیثیت ڈیوائی ہے۔ ایندے علاوہ براہ راست غیر ملکی سرمایہ کاری ، بین الاقوامی سرمایہ کاراں دی دلچسپی وی بینکاری دے شعبے وچ سرمایہ کاری دے حجم نال عیاں ہے جیندا مشاہدہ یو بی ایل، کے بی ایل اتے ایچ بی ایل دے حالیہ سوداں نال تھیندا ہے۔ وزیراعظم آکھیا جو پاکستان دے بینکاری شعبے وچ باہرلی ملکیت مسلسل اتے قابل ذکر طور تے ودھی ہے۔ پاکستان دی حکومت حال وچ چائنہ ڈویلپمنٹ بینک دے نال 700 ملین ڈالر فنانسنگ سمجھوتہ کیتا ہے جیرھاچینی بینکاری صنعت دے نال ایں قسم دا پہلا رابطہ ہے۔ تیان گولی ملک کوں ترقی دے رستے تے چلنڑ اتے معیشت دی بحالی تے وزیراعظم دے ویژن دی تعریف کیتی ۔ انہاں پاکستان دے فعال بینکاری شعبے دی تعریف کریندے ہوئیں آکھیا جو پاکستان دا مالیاتی شعبہ عالمی سرمایہ کاراں سانگے بے شمار مواقع پیش کریندا ہے۔ انہاں آکھیاجو سی پیک پاکستان اتے خطے دے لوکاں سانگے ودھ سارے اقتصادی فائدیاں دا حامل ہے۔