پاکستان اتے ویسٹ انڈیز وچال ڈوجھا کرکٹ ٹیسٹ میچ (کل) توں شروع تھیسی پاکستان کوں سیریز وچ 1-0 دی برتری حاصل کالی آندھی کوں ڈوجھے میچ وچ وی ہرا تے سیریز 2-0 نال اپنڑے ناں کریسوں، مصباح

ابوظہبی ۔20 اکتوبر(اے پی پی )پاکستان اتے ویسٹ انڈیز دیاں کرکٹ ٹیماں وچال ڈوجھا ٹیسٹ میچ (جمعہ)21 اکتوبر توںشیخ زید سٹیڈیم، ابوظہبی وچ شروع تھیسی۔ پاکستان کوں ویسٹ انڈیز دے خلاف ترائے ٹیسٹ میچاں دی سیریزوچ 1-0دی برتری حاصل ہے۔ پاکستان ویسٹ انڈیز دی ٹیم کوں پہلے میچ وچ 56 سکوراں توں ہرایا ہا۔ ایں توں پہلے پاکستان دی ٹیم ویسٹ انڈیز دی ٹیم کو ںٹی ٹونٹی اتے ون ڈے سیریز وچ کلین سویپ کیتا ہا۔ پاکستان دی ٹیسٹ کرکٹ ٹیم دے کپتان اتے مایہ ناز بلے باز مصباح الحق آکھیا ہے جو انہاں دی ٹیم مکمل طور تے فٹ اتے چنگی فارم وچ ہے اتے ویسٹ انڈیز دے خلاف ڈوجھے ٹیسٹ سانگے میدان ون ونجنڑ کیتے بے تاب ہے، انہاں آکھیا جو اوہ ویسٹ انڈیزدے خلاف پہلے ٹیسٹ وچ کامیابی تے بہوں خوش ہن، مصباح آکھیا جو انہاں دی ٹیم کالی آندھی کوں دوجھے میچ وچ وی ہرا تے ترائے میچاں دی سیریز 2-0 نال اپنڑے ناں کریسی۔ ڈوجھے میچ وچ شرکت کرنڑ آلے پاکستانی ٹیم وچ کپتان مصباح الحق، اظہر علی، سمیع اسلم، یونس خان، اسد شفیق، بابر اعظم، سرفراز احمد، محمد نواز، یاسر شاہ، ذوالفقار بابر، محمد عامر، وہاب ریاض، سہیل خان، عمران خان سینئر اتے راحت علی شامل ہن۔ یونس خان کوں ڈینگی بخار وچ مبتلا ہونڑ دی وجہ کنوں پہلے ٹیسٹ وچ شامل کائناں کیتا گیا ہا ۔