سینئرصحافی راݨا ابرار خالد جھوک لݙا ڳئے

اسلام آباد۔ 19 مارچ (اے پی پی) سینئر صحافی، دانشور تے سرائیکی قوم پرست راہنما رانا ابرار خالد گزریل رات اسلام آباد وچ فوت تھی ڳئے۔ او کافی عرصے توں دل تے جگر دے عارضے وچ مبتلا ہن تے پمز ہسپتال وچ زیرِعلاج ہن، پر جانبر نہ تھی سڳئے۔رانا ابرار خالد دا تعلق سرائیکی وسیب دے شہر فاضل پور توں ہئی، مگر انھاں دی سنڄاݨ پورے پاکستان اچ ہک جرات مند صحافی تے ماہرِ معیشت دے طور تے ہئی۔ گزریل ݙو ݙھاکیں توں اسلام آباد اچ رہندے ہوئے انھاں اردو صحافت اچ نمایاں مقام حاصل کیتا تے ویہہ توں زیادہ قومی بجٹ رپورٹس دا گہرائی نال تجزیہ پیش کیتا۔ روزنامہ پاکستان، اوصاف، جہان پاکستان تے انڈیپنڈنٹ اردو جیہے اداریں نال وابستگی دے بعد انھاں “EconomyNewz Rana Abrar Khalid” دے ناں نال یوٹیوب چینل بݨایا، جتھاں او معیشت، سیاست تے حکومتی پالیسیاں تے مدلل تے بے لاگ ڳالھ مہاڑ کریندے رہ ڳئے۔رانا ابرار خالد صرف ہک صحافی کائنی ہن بلکہ سرائیکی وسیب دی ہک مضبوط آواز ہن۔ انھاں اسلام آباد دے ایواناں اچ وی وسیب دا مقدمہ پوری قوت نال لڑیا تے ہرایم این اے و ایم پی اے کوں اے باور کرایا جو او محض ووٹ گھنݨ کیتے کائنی بلکہ آپݨی دھرتی، آپݨے لوکاں تے آپݨی زبان دے حقوق کیتے عملی کردار ادا کرݨ دے پابند ہن۔ انہاں دی وفات تے سرائیکی فورم اسلام آباد دے سارے ممبران تے صحافتی، ادبی تے سرائیکی حلقیں وچ ݙکھ تے افسوس دا اظہار کیتا ویندا پئے تے اینکوں نہ صرف صحافت بلکہ سرائیکی ثقافت تے زبان کیتے ہک وݙا نقصان اے۔