وفاقی وزیرِ خزانہ محمد اورنگزیب دی اڳواݨی اچ پیٹرولیم مصنوعات بارے جائزہ اجلاس

اسلام آباد۔ 24 مارچ(اے پی پی)وفاقی وزیرِ خزانہ محمد اورنگزیب آکھیے جو ویلھے سر منصوبہ بندی، مختلف ملکاں توں درآمدی حکمتِ عملی اتے متعلقہ اداریاں وچال قریبی رابطے پاروں عالمی مارکیٹ اچ قیمتاں دے اتار چڑھاؤ دے باوجود ملک اچ پیٹرولیم مصنوعات دی فراہمی مستحکم رہی اے۔ وفاقی وزیرِ خزانہ محمد اورنگزیب دی صدارت اچ پیٹرولیم مصنوعات دی قیمتاں دی نگرانی کیتے قائم کمیٹی دا اجلاس تھئے جیندے اچ ملک اچ توانائی دی صورتحال اتے عالمی سطح تے تیل اتے گیس دی منڈیاں اچ تھیوݨ والیاں تبدیلیاں دا جائزہ ڳھدا ڳیا۔ اجلاس اچ ݙسایا ڳیا جو خام تیل اتے ریفائنڈ پیٹرولیم مصنوعات دے ذخائر تسلی بخش سطح تے موجود ہن۔ درآمدی معاہدیاں اتے مقامی پیداوار پاروں انھاں ذخائر کوں مزید تقویت ملدی پئی اے۔ درآمدی ٹرمینلز توں ڳھن تے ریفائنریز، سٹوریج سینٹرز اتے ریٹیل آؤٹ لیٹس تک سپلائی چین معمول دے مطابق کم کریندی پئی اے، جیندے نال پورے ملک اچ ایندھن دی مسلسل فراہمی تھیندی پئی اے۔ بحری جہازاں اتے لاجسٹک نظام نال ایندھن دی ترسیل طے شدہ شیڈول دے مطابق جاری اے۔ مارچ اتے اپریل کیتے پیٹرول دے کارگو دا بندوبست کیتا ڳئے اتے ایں سانڳے ٻیاں کھیپاں وی منصوبہ بندی دا حصہ ہین۔ ریفائنریز اپݨی پوری صلاحیت دے مطابق کم کریندیاں پئن اتے خام تیل دی پراسیسنگ کیتے موثر اقدامات جاری ہین۔ کمیٹی کوں عالمی مارکیٹ اچ قیمتاں دے رجحانات اتے انھاں دے مقامی اثرات بارے وی ڈسایا ڳیا۔ وزیرِ خزانہ عزم دوہرایا جو پیٹرولیم مصنوعات دی بغیر کہیں رکاوٹ دے فراہمی حکومت دی پہلی ترجیح اے جیندے کیتے مربوط حکمتِ عملی اتے دانشمندانہ منصوبہ بندی جاری رکھی ویسی۔