چیئرمین سینیٹ نال ملتان ڈسٹرکٹ بار دے وفد دی ملاقات

اسلام آباد۔ 1 اپریل (اے پی پی) چیئرمین سینیٹ سید یوسف رضا گیلانی نال ڈسٹرکٹ بار ایسوسی ایشن ملتان دے نویں منتخب عہدیداراں دے وفد صدر سیدہ بشریٰ نقوی تے جنرل سیکرٹری ملک سعادت حسین دی قیادت وچ ملاقات کیتی۔ سینیٹ سیکرٹریٹ توں جاری بیان موجب چیئرمین سینیٹ سید یوسف رضا گیلانی نویں منتخب عہدیداراں کوں مبارخ ݙٰیندے خاص طور تے سیدہ بشریٰ نقوی کوں ملتان ڈسٹرکٹ بار دی تاریخ وچ پہلی تریمت صدر منتخب تھیوݨ تے خراجِ تحسین پیش کیتا۔ انہاں آکھیا سیدہ بشریٰ نقوی دا پہلی تریمت صدر منتخب تھیوݨ نہ صرف ملتان بلکہ پورے خطے دی وکالت برادری کیتے ہک اہم سنگِ میل اے۔سید یوسف رضا گیلانی ڳالھ مہاڑ کریندے آکھیا پاکستان پیپلز پارٹی آئین تے قانون دی بالادستی تے جمہوریت دے استحکام تے یقین رکھیندی اے تے ایں مقصد کیتے پارٹی ہمیشہ قربانیاں ݙتن۔ انہاں آکھیا بار تے بینچ وچال خوشگوار تعلقات انصاف ݙیوݨ کیتے ٻہوں ضروری ہن، جݙاں جو جنوبی پنجاب دے مسئلیں کوں اجاگر کرݨ وچ ملتان ڈسٹرکٹ بار دا کردار تعریف دے لائق اے۔ انہاں مزید آکھیا ملتان ڈسٹرکٹ بار ہک تاریخی تے باوقار ادارہ اے جیڑھا مسئلیں دے حل کیتے آئینی تے جمہوری راستہ اختیار کریندے، تے او وکلا برادری دے مسئلیں دے حل کیتے اپݨا کردار اڳوں وی ادا کریندے رہسن ۔ ایں موقع تے وفد چیئرمین سینیٹ سید یوسف رضا گیلانی کوں ملتان ڈسٹرکٹ بار آوݨ تے وکلا نال خطاب کرݨ دی دعوت ݙتی۔ چیئرمین سینیٹ وفد کوں یقین ݙیوایا او وقتی ملتان ڈسٹرکٹ بار دا دورہ کریسن، وکلا نال خطاب کریسن تے بار کیتے فنڈنگ حاصل کرݨ کیتے وی ہر ممکن کوشش کریسن۔ ملاقات وچ نائب صدر چوہدری محمد نعیم، جوائنٹ سیکرٹری نگینہ مظفر ہراج، فنانس سیکرٹری رؤوف احمد خان، لائبریری سیکرٹری عمارہ طاہر بلوچ، آڈیٹر جہانزیب سیال، رہنما پی ایل ایف نشید عارف گوندل، رانا جاوید اختر، زوار قریشی، احد گوندل، ممبران ایگزیکٹو محمد شان سہو، ذوالفقار علی شاہ، ندیم الدین قریشی، عدیل احمد خالد، چوہدری محمد احسن بھٹی، محمد مدثر حسن، ملک منیر احمد تے اسسٹنٹ اٹارنی فردوس جمال وی شریک ہن۔