پی سی بی بورڈ آف گورنرز دا اجلاس، اہم انتظامی و مالیاتی امور دی منظوری

لاہور۔ 5 اپریل (اے پی پی) قذافی سٹیڈیم لاہور اچ پی سی بی دے بورڈ آف گورنرز دا 82 واں اجلاس چیئرمین محسن نقوی دی زیرِ صدارت منعقد تھیا، جیندے اچ اہم انتظامی تے مالیاتی امور دی منظوری ݙتی ڳئی اے۔ اجلاس دے دوران مالی سال 25-2024 دے سالانہ آڈٹ شدہ مالیاتی اسٹیٹمنٹس دی باضابطہ منظوری ݙتی ڳئی، جݙاں جو انٹرنیشنل کرکٹ کونسل دے گلوبل اینٹی کرپشن کوڈ موجب پروسیجرل رولز کوں وی منظور کر ڳھدا ڳئے۔اجلاس اچ سعودی عرب کرکٹ فیڈریشن دے نال جدہ اچ کرکٹ اسٹیڈیم دی ڈویلپمنٹ کیتے تعاون دے اظہارِ دلچسپی دی وی منظوری ݙتی ڳئی۔ ایندے توں علاوہ، جغرافیائی حدود کوں سامݨے رکھیندے لاہور دے کرکٹ زونز دی ول حد بندی تے انھاں دے ناویں تے نظرثانی دی منظوری وی ݙتی ڳئی۔ بورڈ آف گورنرز عبداللہ خرم نیازی کوں ڈومیسٹک کرکٹ دے ودھارے اچ نمایاں خدمات تے خراجِ تحسین پیش کیتا۔ ایں موقع تے چیئرمین پی سی بی آکھیا جو پچھلے ݙو سالاں اچ عبداللہ خرم نیازی ڈومیسٹک کرکٹ دی بہتری کیتے ݙینھ رات محنت کیتی اے۔ اجلاس اچ پاکستان سپر لیگ دے یارھویں ایڈیشن کیتے ٹیماں دی ریکارڈ نیلامی تے وی اطمینان تے تشکر دا اظہار کیتا ڳیا۔ محسن نقوی دا آکھݨ ہئی جو پی ایس ایل سرمایہ کاری کیتے ہک بہترین مارکیٹ بݨ چکی اے تے او ویلھا پرے کائنی جݙاں اے دنیا دی نمبر ون کرکٹ لیگ بݨ ویسی۔ اجلاس اچ بورڈ آف گورنرز دے ارکان انوار احمد غنی، طارق سرور سودھے ٻئے شریک ہن ، جݙاں جو ظہیر عباس تے سیکرٹری کیبنٹ آن لائن شرکت کیتی۔ ایندے توں علاوہ پی ایس ایل دے چیف ایگزیکٹو افسر، پی سی بی دے چیف آپریٹنگ افسر سودھے ٻئے متعلقہ حکام وی اجلاس اچ موجود ہن۔