توانائی مارکیٹ دے استحکام کوں برقرار رکھݨ کیتے فعال رابطہ کاری، موثر نگرانی تے مستقل عملدرآمد ضروری اے، وزیرِ خزانہ محمد اورنگزیب دی کابینہ کمیٹی دے اجلاس اچ ڳالھ مہاڑ

اسلام آباد۔ 6 اپریل (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو توانائی مارکیٹ دے استحکام کوں برقرار رکھݨ کیتے فعال رابطہ کاری، موثر نگرانی تے مستقل عملدرآمد ضروری اے۔ ایندھن دی بلاتعطل فراہمی کوں یقینی بݨاوݨ، شفافیت کوں فروغ ݙیوݨ تے صارفین دے مفادات دا تحفظ حکومت دی بنیادی ترجیحات ہن، ذمہ دارانہ صارف رویے دی حوصلہ افزائی وی ضروری اے۔ انھاں اے ڳالھ سنوار کوں اتھاں پٹرولیم مصنوعات دی قیمتاں دی نگرانی کیتے بݨائی ڳئی کابینہ کمیٹی دے اجلاس دی صدارت کریندیں ہوئیں آکھیا، اجلاس اچ قیمتاں اچ حالیہ ردوبدل دے بعد پٹرولیم مصنوعات دی فراہمی دی صورتحال تے مارکیٹ دے حالات دا جائزہ گھدا ڳیا۔ اجلاس اچ سپلائی دے تسلسل کوں یقینی بݨاوݨ، مارکیٹ اچ نظم و ضبط برقرار رکھݨ تے سپلائی چین دے سارے مراحل تے نگرانی دے نظام کوں ٻیا تگڑا بݨاوݨ تے توجہ رکھی ڳئی۔ کمیٹی ملک اچ پٹرولیم مصنوعات دے ذخائر دی مجموعی صورتحال، درآمدی منصوبیاں تے ریفائنری آپریشنز دا تفصیلی جائزہ ڳھدا۔ کمیٹی کوں ݙسایا ڳیا جو مجموعی طور تے سپلائی دی صورتحال مستحکم اے، ڈیزل دے ذخائر تقریباً 25 ݙینہہ دی ضروریات کوں پورا کرݨ کیتے کافی ہن ، پٹرول دی دستیابی موجودہ طلب کوں پورا کرݨ کیتے مناسب اے جݙاں جو کچے تیل دے ذخائر تقریباً 12 ݙینہہ کیتے دستیاب ہن جنھاں کوں آوݨ آلی کارگو کھیپاں تے طے شدہ درآمدات دی مدد حاصل اے۔ پٹرولیم ڈویژن ولوں کمیٹی کوں ݙسایا ڳیا جو آوݨ آلے ہفتیاں کیتے درآمدی انتظامات کمرشل خریداری تے بین الحکومتی معاہدیاں دے ذریعے بروقت جاری ہن ، پیداوار برقرار رکھݨ تے کچے تیل کوں موثر انداز اچ ریفائن شدہ مصنوعات اچ تبدیل کرݨ کیتے ریفائنریاں بہترین سطح تے کم کریندی پئن۔ کمیٹی ایں ڳالھ کوں وی نوٹ کیتا جو قابلِ اعتماد توانائی دی فراہمی زراعت، کھاد سازی، ٹرانسپورٹ تے صنعت سویں اہم شعبیاں دی مدد کیتے ٻہوں ضروری اے اتے اے معاشی سرگرمیاں دے تسلسل تے قیمتاں دے استحکام اچ بنیادی کردار ادا کریندی اے۔ قیمتاں اچ حالیہ تبدیلی دے تناظر اچ کمیٹی سپلائی چین دے سارے مراحل تے مسلسل نگرانی برقرار رکھݨ تے زور ݙتا تاںجو ذخیرہ اندوزی، قیاس آرائی تے مبنی سرگرمیاں تے مصنوعات دی دستیابی اچ کہیں وی قسم دی رکاوٹ کوں روکیا ونڃ سڳے۔ طلب دے رجحانات، خاص طور تے مقامی سطح تے کھپت اچ تھیوݨ آلے فرق دی قریبی نگرانی دی اہمیت کوں اجاگر کیتا ڳیا تاں جو سپلائی دا متوازن انتظام ممکن بݨایا ونڃ سڳے۔ کمیٹی غیر قانونی ذخیرہ اندوزی دی حوصلہ شکنی تے ریگولیٹری فریم ورک دے اندر مارکیٹ اچ بے ضابطگیاں دے تدارک دی لوڑھ تے وی زور ݙتا۔ اجلاس اچ گیس دی فراہمی دی صورتحال دا وی جائزہ گھدا ڳیا جیندے اچ سوئی سدرن تے سوئی ناردرن دے ذخائر دی پوزیشن شامل ہئی، گھریلو صارفین کیتے گیس دی دستیابی دے انتظام تے گیس دی تقسیم کوں گھریلو تے بجلی دے شعبیاں دے درمیان متوازن رکھݨ دے مختلف آپشنز تے ڳالھ کیتی ڳئی۔ ارکان موسمی طلب تے ایل پی جی تے ودھدے ہوئے انحصار دے پاروں وسائل دے موثر استعمال کوں یقینی بݨاوݨ کیتے متوازن تے ڈیٹا تے مبنی حکمتِ عملی اپناوݨ تے زور ݙتا۔ کمیٹی اوگرا ولوں متعارف کرائے ڳئے ڈیجیٹل ڈیش بورڈ دے ذریعے نگرانی تے ڈیٹا تے مبنی نظام کوں تگڑا بݨاوݨ تے خصوصی زور ݙتا جیڑھا ڈپو توں گھن تے ریٹیل آؤٹ لیٹس تائیں ذخائر دی سطح، فروخت تے سپلائی دی صورتحال کوں حقیقی وقت اچ ݙیکھݨ دی سہولت فراہم کرݨ کیتے تیار کیتا ڳئے۔ توقع اے جو اے ڈیش بورڈ فروخت، اسٹاک تے طلب اچ اتار چڑھاؤ جہے اہم اشاریاں دی نگرانی کیتے مرکزی کم کریسی جیندے نال سپلائی اچ ممکنہ خلا دی بروقت نشاندہی تے معقول فیصلے کرݨ اچ مدد ملسی ۔ کمیٹی نوٹ کیتا جو ملک بھر اچ موجود 12 ہزار توں ودھ پٹرول پمپاں دے حجم پاروں ریٹیل آؤٹ لیٹس توں ڈیٹا رپورٹنگ فی الحال توقعات توں ڳھٹ اے، کمیٹی نظام دے مکمل فعال تھیوݨ دی ضرورت تے زور ݙتا تاں جو ایندے مقاصد حاصل کیتے ونڃ سڳن ۔ وزیرِ خزانہ ڈیٹا دے بروقت انضمام دی اہمیت تے زور ݙیندیں ہوئیں سارے متعلقہ فریقین کوں فیصلہ سازی کیتے ڈیش بورڈ دے موثر استعمال کوں یقینی بݨاوݨ کیتے معلومات دی فوری تے درست فراہمی کوں یقینی بݨاوݨ دی ہدایت کیتی۔ اوگرا کوں ہدایت ݙتی ڳئی جو ڈیٹا رپورٹنگ دے تقاضیاں تے مکمل عملدرآمد یقینی بݨاوے، سپلائی چین اچ ڈیجیٹلائزیشن دے عمل کوں تیکھا کرے، تے آئل مارکیٹنگ کمپنیاں تے ٻئے متعلقہ فریقین دے نال قریبی رابطہ برقرار رکھے تاں جو نظام دا ہموار نفاذ ممکن بݨایا ونڃ سڳے۔ اجلاس اچ وفاقی وزیرِ پٹرولیم علی پرویز ملک، وفاقی وزیرِ ماحولیاتی تبدیلی ڈاکٹر مصدق مسعود ملک، وفاقی وزیرِ قومی غذائی تحفظ رانا تنویر حسین (ورچوئل)، وفاقی وزیرِ بحری امور محمد جنید انور چوہدری (ورچوئل)، تے وفاقی وزیرِ توانائی سردار اویس احمد خان لغاری (ورچوئل) دے علاوہ متعلقہ وزارتاں، ڈویژنز اتے ریگولیٹری اداریاں دے وفاقی سیکریٹریز تے سینئر افسراں شرکت کیتی۔