صحت مند قوم ای ترقی یافتہ پاکستان دی ضمانت اے ، ڈاکٹر فرح ناز اکبر

اسلام آباد۔ 6 اپریل (اے پی پی سرائیکی نیوز سروس) اسلام آباد کریسنٹ لائنز کلب ولوں عالمی یومِ صحت دے موقع تے ہک پروقار تقریب/ گیسٹ سپیکر میٹنگ دا انعقاد کیتا ڳیا، جیندے اچ پارلیمانی سیکریٹری برائے وزارتِ ثقافت تے قومی ورثہ، حکومتِ پاکستان، ڈاکٹر فرح ناز اکبر بطور مہمانِ خصوصی شرکت کیتی اے۔ تقریب اچ سپریم کورٹ گلگت بلتستان دے سابق چیف جسٹس، جسٹس (ر) رانا محمد شمیم بطور معزز مہمانِ خاص شریک ہن ، جݙاں جو گیسٹ سپیکر ڈاکٹر مسعود غنی سابق ڈسٹرکٹ گورنر لائنز کلب عالمی یومِ صحت دی اہمیت تے ایندے مختلف پہلوواں تے تفصیلی روشنی پاتی۔ آپݨے خطاب اچ ڈاکٹر فرح ناز اکبر آکھیا جو صحت ہک بنیادی انسانی حق اے اتے ہک تگڑے، خوشحال تے ترقی یافتہ پاکستان دی بنیاد وی اے۔ انھاں آکھیا جو اساݙی ثقافتی روایات تے طرزِ زندگی ہک صحت مند معاشرے دے قیام اچ کلیدی کردار ادا کریندن ، جنھاں اچ سادہ طرزِ زندگی، متوازن غذا، تگڑا خاندانی نظام تے فطرت نال قربت شامل اے۔ انھاں حکومتِ پاکستان ولوں صحت دے شعبے اچ کیتے ڳئے اقدامات دا ذکر کریندیں ہوئیں آکھیا جو بنیادی صحت دی سہولیات دی بہتری، دیہی علاقیاں اچ طبی خدمات دی فراہمی، ماں تے ٻال دی صحت دے پروگرامز، تے جدید طبی سہولیات دی دستیابی حکومت دی اولین ترجیحات اچ شامل اے۔ انھاں ایں ڳالھ تے زور ݙتا جو صحت صرف علاج تائیں محدود کائنی بلکہ ہک ہمہ گیر طرزِ زندگی اے، جیندے اچ صاف پاݨی، متوازن غذا، باقاعدہ جسمانی سرگرمی، ذہنی سکون تے صاف ستھرا ماحول بنیادی عناصر اے۔ پارلیمانی سیکریٹری نویں نسل کوں ملک دا قیمتی سرمایہ قرار ݙیندیں ہوئیں آکھیا جو صحت مند تے باشعور نوجوان ای پاکستان دے روشن مستقبل دی ضمانت ہن، لہٰذا صحت دے حوالے نال شعور اجاگر کرݨ وقت دی اہم لوڑھ اے۔ تقریب دے دوران ڈاکٹر مسعود غنی صحت متعلق آگاہی فراہم کیتی تے حاضرین کوں صحت مند طرزِ زندگی اپناوݨ دی تلقین کیتی ۔ کلب دے صدر محمد عسکری نقوی تے کلب سیکرٹری سبطین رضا لودھی نے تقریب دے کامیاب انعقاد اچ اہم کردار ادا کیتے۔ محترمہ فرح ناز اکبر ایں عزم دا اعادہ کیتا جو حکومتِ پاکستان عوام دی صحت تے فلاح و بہبود کیتے آپݨی کوششاں جاری رکھیسی اتے ہک صحت مند، تگڑے تے خوشحال پاکستان دے قیام کیتے پرعزم اے۔ تقریب اچ شہر دے مختلف طبقات دی نمائندگی ہئی۔ چھیکڑ اچ کلب دے صدر محمد عسکری نقوی ولوں مہمانانِ خصوصی دی خدمت اچ سوینیر پیش کیتے ڳئے۔ تقریب دے چھیکڑ اچ سارے مہماناں دی آمد دا شکریہ محترم شعبان صاحب کیتا۔

ڈاکٹر سعدیہ کمال