مظفرڳڑھ، مبینہ پولیس مقابلے اچ ݙو سڳے بھرا جاں بحق، پولیس ذرائع

مظفرڳڑھ۔ 10 اپریل (اے پی پی):ضلع رحیم یار خان دے سرکل خان پور اچ مبینہ پولیس مقابلے دے دوران ݙو سڳے بھرا جاں بحق تھئی ڳئن۔ جاں بحق تھیوݨ آلے ملزمان دی سنجاݨ حسیب بھٹی تے چھوٹا بھرا توحید بھٹی (المعروف کھوکھر) دے ناں توں تھئی اے، جنھاں دا تعلق مظفرڳڑھ دی تحصیل جتوئی توں ݙسایا ویندا پئے۔ پولیس ذرائع دے مطابق، جاں بحق تھیوݨ آلا ملزم حسیب بھٹی المعروف کھوکھر ماضی اچ ضلع مظفرڳڑھ دے مختلف تھانیاں اچ بطور تفتیشی افسراں دا رائٹر وی کم کیتا ہوئے۔ پولیس ریکارڈ دے مطابق، انھاں ملزماں دا پیو وی انتہائی سنگین جرائم، بشمول چوری تے ڈکیتی، قتل تے اقدامِ قتل، اغوا تے زنا سویں مقدمات اچ پولیس کوں مطلوب اے اتے ایں ویلھے روپوش اے۔ پولیس حکام دا آکھݨ اے جو اے مقابلہ خان پور دے علاقے اچ اوں وقت پیش آیا جݙاں پولیس تے جرائم پیشہ افراد وچال فائرنگ دا تبادلہ تھیا۔ فائرنگ دے نتیجے اچ ݙوہیں بھرا موقع تے دم ݙے ݙتا۔ ملزماں دے قبضے توں اسلحہ تے مسروقہ سامان وی برآمد تھیوݨ دی اطلاعات ہن، پولیس لاشاں کوں پوسٹ مارٹم کیتے ہسپتال منتقل کر ݙتے۔