21 فروری ماء ٻولی دے جڳ ݙیہاڑے تے اسلام آباد اچ سرائیکی زبان ،ادب تے ثقافت دے ودھارے سانگے “سرائیکی ادبی ثقافتی فورم” دے ناں نال ہک نویں تنظیم ٻݨا ݙتی ڳئی اے

اسلام آباد۔ 21 فروری (اے پی پی) اسلام آباد اچ سرائیکی زبان ،ادب تے ثقافت دے ودھارے سانگے “سرائیکی ادبی ثقافتی فورم” دے ناں نال ہک نویں تنظیم ٻݨائی ڳئی اے، ایں فورم دا اعلان 21 فروری ماء ٻولی دے جڳ ݙیہاڑے تے کِیتا ڳئے جیڑھا جمل جہان  اچ لسانی تے ثقافتی تنوع دے تحفظ دی اہمیت کوں نشابرکرݨ کیتے منایا ویندے۔ تنظیم موجب اے فورم وکھو وکھ ادبی سرگرمیاں، ثقافتی تقریبات ، تحقیقی کم تے علمی،ادبی نشستاں ذریعے سرائیکی زبان تے ثقافت دے ودھارے اچ آپدا کردار نبھیسی ۔ فورم دے عہدیداریں پکا ارادہ  ظاہر کِیتے جو او نویں پیڑھی  اچ آپدی ماء ٻولی اتے تہذیبی سنڄاݨ  دے شعور کوں جگاوݨ کیتے عملی قدم چیسن ـ  فورم دے عہدیداریں دا اعلان وی کر ݙتا ڳئے جیندے اچ عاشق خان بزدار سرپرستِ اعلیٰ ، مظہر عارف سرپرست ، سلیم شہزاد صدر ، ڈاکٹر مقبول گیلانی سینئر نائب صدر ، حمیدہ کوثر نائب صدر ، ڈاکٹر سعدیہ کمال جنرل سیکرٹری ، ڈاکٹر عصمت اللہ شاہ ڈپٹی جنرل سیکرٹری ، جہانگیر مخلص کنوینئر ، ادی نینا (نسرین گل) رابطہ سیکرٹری ، ابراہیم بیگ فنانس سیکرٹری تے شاہد دھریجہ کوں پریس سیکرٹری مقرر کِیتا ڳئے ـایندے علاوہ عباس ݙاہر کوں تدوین تے تحقیق ، عمران مسراݨی کوں نینگریں (یوتھ ) ، مزمل عارض کوں سٹوڈنٹس، واسو خان ، زوہیر خورشید تے پلوشہ کوں بالیں دی ذمے واری ݙتی ڳئی اے۔ سمیع بزدار بلوچ ،خورشید احمد تے اکرم گرماݨی کوں ثقافتی کمیٹی اچ شامل کِیتا ڳے۔ امجد نذیر کوں واٹس ایپ گروپ ایڈمن سنبھالݨ دی ذمہ داری ݙتی ڳئی اے۔

ڈاکٹر سعدیہ کمال