پاکستان مالیتی خلا پر کرݨ کیتے متبادل بیرونی ذرائع استعمال کرݨ دی پالیسی تے چلدا پئے، وفاقی وزیر خزانہ محمد اورنگزیب دا واشنگٹن اچ انٹرویو

اسلام آباد۔14 اپریل(اے پی پی)وفاقی وزیرِ خزانہ و محصولات سینیٹر محمد اورنگزیب آکھیے جو تیل دیاں ودھدیاں قیمتاں نال زرمبادلہ دے ذخائر کوں مستحکم رکھݨ کیتے پاکستان مختلف ممالک اتے مالیاتی اداریاں توں معاونت گھنݨ دے امکانات تے غور کریندا پئے، پاکستان پہلی واری “پانڈا بانڈ” جاری کرݨ دی تیار اچ اے، بین الاقوامی مالیاتی فنڈ دا بورڈ ایں مہینے دے چھیکڑ یا اگلے مہینے دے آغاز تئیں پاکستان کیتے قرض دی نویں قسط دی منظوری ݙے سڳدے۔ آئی ایم ایف اتے عالمی بینک دے سالانہ اجلاس دے موقع تے واشنگٹن اچ بلومبرگ اتے برطانوی خبر رساں ادارہ رائٹرز کوں انٹرویو ݙیندے ہوئیں وزیر خزانہ آکھیا جیڑھا وی مالی خلا پُر کرݨا ہوسی او مختلف ذرائع توں پورا کیتا ویسی، جیندے اچ کمرشل قرضے اتے ݙو طرفہ مالی معاونت شامل اے۔ وزیر خزانہ آکھیا جو فروری دے چھیکڑ اچ ایران اتے امریکی و اسرائیلی حملے توں پہلے پاکستان دے مالی اتے زرمبادلہ دے ذخائر مضبوط ہن، پاکستان قرضیاں دی ادائیگی دی صلاحیت دے حوالے نال پراعتماد اے۔ انہاں آکھیا جو اساں ادائیگی کیتے پُرعزم ہیں اتے اے یقینی بݨیسوں جو ذخائر کوں مناسب سطح تے رکھݨ کیتے ٻئے وسائل وی دستیاب ہوون۔ وزیر خزانہ آکھیا جو پاکستان دا رواں سال عالمی بانڈ مارکیٹ اچ واپسی دا ارادہ اے اتے چار سال دے وقفے دے بعد یوروبانڈز جاری تھیسن۔ حکومت تیکھے انھاں بانڈز کیتے لیڈ مینیجرز دے انتخاب دا عمل شروع کریسی۔ انہاں ݙسایا جو پاکستان پہلی واری چینی کرنسی اچ بانڈز (پانڈا بانڈز) جاری کرݨ دی وی تیاری کریندا پئے، جیڑھے ٻئی سہ ماہی اچ متوقع ہن۔ ابتدائی اجرا 25 کروڑ ڈالر دا ہوسی۔ پاکستان کوں امید اے جو آئی ایم ایف جلد ہی 7 ارب ڈالر دے بیل آؤٹ پروگرام دی اگلی قسط دی منظوری ݙے ݙیسی، جیندے توں تقریباً 1.3 ارب ڈالر حاصل تھیسن۔ انہاں آکھیا جو پاکستان اپݨے سارے قرضیاں دی ادائیگی دی صلاحیت رکھدے اتے ایندے زرمبادلہ دے ذخائر ایں ویلے تقریباً 2.8 مہینے دی درآمدات دے برابر ہین۔ وزیر خزانہ آکھیا جو تقریباً 4 فیصد جی ڈی پی نمو اتے 41.5 ارب ڈالر دی ترسیلاتِ زر (ریمیٹینسز) ایران جنگ دے معاشی اثرات کوں برداشت کرݨ اچ مدد ݙے سڳدن۔ انہاں آکھیا جو ملک کوں ایندھن اتے ایل پی جی دے اسٹریٹجک ذخائر قائم کرݨے ہوسن اتے قابلِ تجدید توانائی دو منتقلی تیز کرݨی ہوسی۔