وفاقی وزیرِ تجارت نال اٹلی اتے ڈنمارک دیاں سفیراں دی ملاقات

خبر نمبر:10

اسلام آباد: 15 اپریل (اے پی پی)وفاقی وزیرِ تجارت جام کمال خان نال اٹلی دی سفیر مارلینا آرمَلین اتے ڈنمارک دی سفیر ماجا مورٹینسن ملاقات کیتی اے، جیندے اچ ݙو پاسہ تجارت، سرمایہ کاری اتے معاشی تعاون کوں ودھاوݨ بارے ڳالھ مہاڑ کیتی ڳئی۔ وزیرِ تجارت پاکستان دے ہک ذمہ دار عالمی شراکت دارانہ کردار کوں اڳونہا کریندے آکھیا جو ساݙا ملک خطے اچ کشیدگی دے دوران مکالمے اتے امن کیتے سرگرم کردار ادا کریندا پئے۔ انہاں آکھیا جو حالیہ عالمی صورتحال، خاص طور تے آبنائے ہرمز جہیں اہم بحری رستیاں اچ رکاوٹاں پاروں عالمی سپلائی چین متاثر تھئی اے، جیندے نال توانائی، خوراک، دوائیاں اتے صنعتی خام مال دی ترسیل تے اثر پئے۔ جام کمال خان آکھیا جو پاکستان دی 25 کروڑ توں زیادہ آبادی، قدرتی وسائل تے جغرافیائی اہمیت ایکوں وݙی معاشی قوت ٻݨاوݨ دی صلاحیت رکھدی اے، فی کس آمدنی اچ بہتری نال پاکستان ہک اہم درآمدی اتے صارف مارکیٹ دے طور تے سامݨے آ سڳدے، جیندے نال ٻاہرلے ملک دے سرمایہ کاراں کیتے وݙے مواقع پیدا تھیسن۔ اطالوی اتے ڈینش سفیراں وی انہاں امکانات کوں منیا اتے مختلف شعبیاں اچ تعاون ودھاوݨ اچ دلچسپی ݙکھائی۔ ملاقات اچ نیشنل ٹیرف پالیسی دے تحت جاری اصلاحات بارے وی تفصیلی ڳالھ تھئی، جیندا مقصد پنڄ سال اچ بتدریج ٹیرف گھٹ کر کے برآمدات کوں ودھاوݨ اتے مسابقت پیدا کرݨ اے۔ملاقات اچ ڈیری سیکٹر دی ترقی بارے وی ڳالھ مہاڑ تھئی، جیندے اچ ڈنمارک ولوں ویسٹ مینجمنٹ اتے ویلیو ایڈڈ مصنوعات (جیویں پروٹین ڈرنکس تے بارز) بݨاوݨ دے منصوبے پیش کیتے ڳئے۔ سفیراں فارماسیوٹیکل شعبے اچ کڄھ مجوزہ تبدیلیاں اتے خدشات دا اظہار کیتا، جیندے تے وزیرِ تجارت یقین ݙوایا جو پاکستان بین الاقوامی معیار دے مطابق آئی پی (IP) قوانین دا تحفظ یقینی ٻݨیسی اتے سرمایہ کاراں دا اعتماد برقرار رکھیا ویسی۔