آپریشن بنیان مرصوص دی کامیابی تے پنجاب اسمبلی اچ قرارداد جمع

لاہور۔ 8 مئی(اے پی پی) آپریشن بنیان مرصوص دی کامیابی دا ہک سال مکمل تھیوݨ تے پنجاب اسمبلی اچ ہک قرارداد جمع کرائی ڳئی اے۔ اے قرارداد مسلم لیگ (ن) دی ممبر اسمبلی عظمیٰ کاردار جمع کرائی۔ قرارداد دے متن اچ آکھیا ڳئے جو اڄ بنیان مرصوص کوں ہک سال پورا تھیندا پئے اتے اے او ݙینہہ اے جݙاں پاکستان دے غیرت مند پتراں دشمن دی جارحیت دے سامݨے سیسہ پلائی دیوار ٻݨ تے اے ثابت کیتا جو ایں وطن دو اٹھݨ والا ہر ناپاک ہتھ تروڑ ݙتا ویسی۔ قرارداد اچ آکھیا ڳیا جو تاریخ گواہ اے جݙاں وی دشمن پاکستان کوں للکاریے، ساݙی بہادر افواج اپݨی پیشہ ورانہ مہارت اتے ایمانی جذبے نال اوکوں اینڄھا سبق سکھائے جیڑھا نسلاں تک یاد رکھا ویسی۔ متن موجب بنیان مرصوص صرف ہک عسکری کارروائی کائنا ہئی ٻھل اے دشمن دے غرور کوں مٹی اچ ملاوݨ تے اوکوں اوندی اوقات یاد ݙیواوݨ دا فیصلہ کن جواب ہئی۔ قرارداد اچ ایں ڳالھ تے زور ݙتا ڳئے جو پوری قوم ݙٹھے جو کیویں قومی قیادت اتے افواجِ پاکستان دے جواناں کٹھے تھی تے دشمن دے ناپاک ارادیاں کوں سرحد پار ہی دفن کر ݙتا۔ اڄ دے ایں تاریخی موقعے تے افواجِ پاکستان کوں خراجِ تحسین پیش کیتا ویندے۔ اخیر اچ دشمن کوں سنیہا ݙتا ڳئے جو اے وطن ناقابلِ تسخیر اے اتے ان شاء اللہ ہمیشہ رہسی۔