مساوات تے وقار دا تحفظ عدلیہ دی بنیادی ذمہ واری اے، چیف جسٹس یحییٰ آفریدی

اسلام آباد۔ 11 مئی (اے پی پی) چیف جسٹس آف پاکستان یحییٰ آفریدی آکھیے آئین وچ درج مساوات، وقار تے عدم امتیاز دے اصولاں دا تحفظ عدلیہ دی بنیادی ذمہ واری اے تے اداریاں وچ محفوظ، باعزت تے جامع پیشہ ورانہ ماحول دا ودھارا ویلھے دی اہم لوڑھ اے۔ سپریم کورٹ دے شعبہ تعلقاتِ عامہ دے جاری کیتے ڳئے اعلامیے دے مطابق اے ڳالھ انہاں سپریم کورٹ وچ وفاقی محتسب انسدادِ ہراسیت خواتین فوزیہ وقار نال ملاقات دے دوران آکھی۔ ملاقات وچ صنفی حساس انصاف، کم دی جاہ تے وقار دے تحفظ تے ہراسیت دے خلاف موثر ادارہ جاتی نظام دے امور تے تفصیلی ڳالھ مہاڑ کیتی ڳئی۔ فوزیہ وقار چیف جسٹس کوں اپݨے ادارے دے کردار تے مینڈیٹ توں آگاہ کیتا تے ݙسایا جو وفاقی محتسب دا ادارہ سرکاری تے نجی شعبیں وچ تریمتاں سانڳے محفوظ ماحول بݨاوݨ سانڳے اقدامات کریندا پئے۔ ملاقات وچ ایں ڳالھ تے اتفاق کیتا ڳیا ہراسیت دے قنوناں تے موثر عملدرآمد، متاثرین کوں وقتی قانونی امداد تے آگاہی وچ ودھارا ضروری اے۔ چیف جسٹس آکھیا جو عدلیہ آئینی اصولاں دے تحفظ تے مساوی انصاف ݙیوݨ دے عزم تے قائم اے جݙاں جو محفوظ تے باعزت ماحول کہیں وی ادارے دی بنیادی لوڑھ اے۔