موجودہ علاقائی صورتحال دے تناظر اچ مقامی ریفائننگ صلاحیت ودھاوݨ ویلھے دی اہم لوڑھ اے، وفاقی وزیر پٹرولیم علی پرویز ملک

اسلام آباد۔11 مئی (اے پی پی) وفاقی وزیر پٹرولیم علی پرویز ملک ملکی توانائی دے تحفظ کوں مضبوط بݨاوݨ کیتے آئل ریفائنریاں دی ویلھے تے اپ گریڈیشن کوں لازمی قرار ݙیندے آکھیے جو موجودہ علاقائی صورتحال دے تناظر اچ مقامی ریفائننگ صلاحیت ودھاوݨ ویلھے دی وݙی لوڑھ اے، ریفائنریاں دے جدید تھیوݨ نال نہ صرف “یورو فائیو” معیار دا صاف ایندھن بݨ سڳسی بلکہ پاکستان ٻاہرلی سپلائی چینز تے انحصار گھٹ کرتے توانائی دے شعبے اچ زیادہ خودمختاری حاصل کرسڳسی۔ اے ڳالھ انہاں پٹرولیم ڈویژن اچ ملک دی آئل ریفائنریاں دے چیف ایگزیکٹو افسران تے منیجنگ ڈائریکٹرز نال ہک اعلیٰ سطح دے اجلاس دی صدارت دے دوران ڳالھ مہاڑ کریندے آکھی ۔ اجلاس اچ “براؤن فیلڈ اپ گریڈیشن ریفائنری پالیسی” تے عملدرآمد دا جائزہ ڳھدا ڳیا تے ایں عمل کوں تکھا کرݨ تے غور کیتا ڳیا۔ اجلاس اچ وفاقی وزیر ریفائننگ سیکٹر دی اہمیت کوں اجاگر کریندے آکھیے جو مقامی ریفائنریاں ایندھن دی مسلسل فراہمی تے پاکستان دے توانائی تحفظ کوں مضبوط بݨاوݨ کیتے قومی اثاثیں دی حیثیت رکھیندن۔ انھاں آکھیے جو امریکہ تے ایران وچال جاری کشیدگی پاروں پیدا تھیوݨ آلی علاقائی صورتحال ٻاہرلی سپلائی چینز تے انحصار گھٹ کرݨ تے مقامی ریفائننگ صلاحیت کوں زیادہ توں زیادہ ودھاوݨ دی لوڑھ کوں مزید واضح کر ݙتے۔ وفاقی وزیر آکھیے جو موجودہ ریفائنریاں دی ویلھے تے اپ گریڈیشن پیداوار ودھاوݨ، کارکردگی بہتر بݨاوݨ تے بین الاقوامی معیار موجب صاف ستھرے یورو فائیو ایندھن ݙیوݨ کیتے ناگزیر اے۔ انھاں آکھیے جو ایندے نال ماحول اچ بہتری، انڄݨ دی بہتر کارکردگی تے دھوئیں اچ کمی اچ مدد ملسی۔ وفاقی وزیر ایں ڳالھ تے افسوس کیتا جو 2023ء اچ ݙوہیں ریفائننگ پالیسیاں دے آوݨ دے باوجود انھاں تے عملدرآمد کائنی تھیا۔ انھاں آکھیے جو ریفائنریاں دی جدید کاری تے طویل المدتی سرمایہ کاری کیتے رکاوٹاں کوں ختم کرݨ ضروری اے۔ اجلاس اچ ریفائننگ پالیسیاں تے اپ گریڈیشن معاہدے دے خاکے دا تفصیلی جائزہ ڳھدا ڳیا تاں جو انھاں تے موثر تے ویلھے تے عملدرآمد کوں یقینی بݨایا ونڄ سڳے سٹی۔ چیف ایگزیکٹو افسران تے منیجنگ ڈائریکٹرز پیش آوݨ آلے مسئلیں دی نشاندہی کریندے انھاں دے حل وی پیش کیتے۔ پٹرولیم مصنوعات تے سیلز ٹیکس دی چھوٹ کوں اپ گریڈیشن منصوبیں کیتے ہک وݙا مسئلہ قرار ݙتا ڳیا۔ وفاقی وزیرہدایت کیتی جو انھاں چیلنجز دے حل کیتے ہک مکمل تجویز آندے بجٹ دی تیاری توں پہلے متعلقہ فورم کوں پیش کیتی ونڄے تاں جوریفائننگ پالیسیاں تے مزید تاخیر دے بغیر عملدرآمد ممکن بݨایا ونڄ سڳے۔ وفاقی وزیر حکومت دے ایں عزم دا اعادہ کیتا جو ریفائنری اپ گریڈیشن قومی ترجیح اے۔ اجلاس اچ سیکرٹری پٹرولیم، ایڈیشنل سیکرٹری (پالیسی)، ڈائریکٹر جنرل آئل، پاکستان ریفائنری لمیٹڈ دے سی ای او، پارکو دے منیجنگ ڈائریکٹر، اٹک ریفائنری دے سی ای او، سینرجیکو (Cynergico) دے سی ای او تے نیشنل ریفائنری لمیٹڈ دے سی ای او شرکت کیتی۔