افغان ناظم الامور دی دفتر خارجہ طلبی، فتح خیل پولیس پوسٹ تے حملے تے احتجاج ریکارڈ کرایا

اسلام آباد۔11 مئی (اے پی پی) پاکستان نے افغان ناظم الامور کوں دفتر خارجہ سݙ تے 9 مئی 2026ء کوں خیبر پختونخوا دے ضلع بنوں اچ فتح خیل پولیس پوسٹ تے “فتنہ الخوارج” دے دہشت گرداں ولوں گاݙی اچ لاتے ڳئے بارودی مواد دے ذریعے بزدلانہ حملے تے شدید احتجاج ریکارڈ کرائے۔ ایں حملے اچ 15 پولیس اہلکار شہید جݙاں جو ہک شہری سودھے 4 بندے زخمی تھئے۔ ترجمان دفتر خارجہ ولوں جاری بیان موجب وزارت خارجہ افغان ناظم الامور کوں ݙسایا جو واقعے دی تفصیلی تحقیقات تے شواہد توں پتہ چلدے جو ایں حملے دی منصوبہ بندی افغانستان اچ موجود دہشت گرداں کیتی ہئی۔ پاکستان ہک واری ول افغان سرزمین دے پاکستان دے خلاف دہشت گرد حملیں کیتے مسلسل استعمال تے آپݨی شدید تشویش دا اظہار کریندے افغان سائیڈ تے واضح کیتا جو پاکستان ایں بربریت دے ذمہ وار عناصر دے خلاف فیصلہ کن کارروائی دا حق محفوظ رکھیندے۔ اے وی ݙسایا ڳیا جو افغان سرزمین تے مختلف دہشت گرد تنظیماں دی موجودگی دی نشاندہی اقوام متحدہ دی مانیٹرنگ ٹیم تے ٻئے بین الاقوامی اداریں دی رپورٹاں اچ وی کیتی ونڄ چکی اے۔ دہشت گردی دے خلاف جنگ ہک سانجھا مقصد اے تے افغان طالبان کوں آپݨے ایں وعدے دی پابندی کرݨی ہوسی جو او آپݨی سرزمین کہیں ٻئے ملک دے خلاف دہشت گردی کیتے استعمال نہ تھیوݨ ݙیسن۔ پاکستان کئی واری افغان طالبان حکومت تے زور ݙیندا رہیے جو او افغان سرزمین توں سرگرم فتنہ الخوارج، فتنہ الہندوستان تے داعش/آئی ایس کے پی عناصر دے خلاف ٹھوس اقدامات کرے۔ پاکستان بھرا تے دوست ملکاں دی ثالثی اچ تھیوݨ آلے مذاکرات دے ذریعے افغان طالبان حکومت نال رابطے وی رکھئے پر افغان طالبان مسلسل انھاں دہشت گرد تنظیماں دے خلاف کارروائی دے وعدیں اچ ناکام رہیے۔ افغان طالبان حکومت کوں صاف الفاظ اچ ݙسایا ڳئے جے انھاں دہشت گرد تنظیماں کوں پناہ ݙیوݨ جاری رکھیا تاں پاکستان آپݨی قومی سلامتی تے آپݨے شہریاں دی حفاظت تے کوئی سمجھوتہ نہ کریسے۔