وزیراعظم دی چھوٹے تے درمیانے درجے دے کاروبار تے صنعتاں کوں حکومتی سہولتاں ݙیوݨ کیتے لائحہ عمل تیار کرݨ دی ہدایت

اسلام آباد۔11 مئی (اے پی پی) وزیراعظم محمد شہباز شریف برآمدات تے مبنی صنعت کوں ملکی ترقی دے اہداف دے حصول کیتے لازمی قرار ݙیندے چھوٹے تے درمیانے درجے دے کاروبار تے صنعتاں کوں حکومتی سہولتاں ݙیوݨ کیتے لائحہ عمل تیار کرݨ دی ہدایت کیتی اے۔ وزیراعظم محمد شہباز شریف دی صدارت اچ ملکی برآمدات اچ ودھارے دے حوالے نال حکمت عملی تے اجلاس اتھاں تھیا جیندے اچ نائب وزیراعظم تے وزیرخارجہ محمد اسحاق ڈار، وفاقی وزیر اقتصادی امور احد خان چیمہ، وفاقی وزیر تجارت جام کمال خان، وفاقی وزیر قومی غذائی تحفظ و تحقیق رانا تنویر حسین، وفاقی وزیر موسمیاتی تبدیلی مصدق ملک، وفاقی وزیر خزانہ و محصولات محمد اورنگزیب، وفاقی وزیر انفارمیشن ٹیکنالوجی و ٹیلی کام شزا فاطمہ، وزیر مملکت خزانہ و ریلوے بلال اظہر کیانی، وزیراعظم دے معاون خصوصی صنعت و پیداوار ہارون اختر تے متعلقہ اعلیٰ سرکاری افسران شرکت کیتی۔ وزیراعظم دفتردے میڈیا ونگ توں جاری بیان موجب، وزیراعظم اجلاس نال خطاب کریندے ہدایت کیتی جو ایجھے نویں کاروباراں تے صنعتاں دے ودھارے کیتے حکمت عملی بݨائی ونڄے جیڑھے ملکی برآمدات ودھاوݨ دا ذریعہ بݨن۔ انھاں برآمدات تے مبنی صنعت کوں ملکی ترقی دے اہداف کیتے ناگزیر قرار ݙیندے آکھیے جو حکومت آپݨی توجہ برآمدات ودھاوݨ تے صنعتاں کوں سہولتاں ݙیوݨ تے رکھی ہوئی اے۔ انھاں ہدایت کیتی جو ایجھے چھوٹے تے درمیانے درجے دے کاروبار جیڑھے برآمدات اچ ودھارے کیتے اہم ہن، انھاں کوں حکومتی سہولتاں ݙیوݨ دا لائحہ عمل تیار کیتا ونڄے۔ وزیراعظم آکھیے جو ملکی صنعت تے تجارت اچ ریسرچ اینڈ ڈویلپمنٹ تے جدت ملکی مصنوعات کوں عالمی مارکیٹ اچ مقابلہ کرݨ اچ مدد ݙیسی۔ وزیراعظم برآمد کنندگان کوں ٹیکس ریفنڈ دی ویلھے تے ادائیگی دی ہدایت کیتی۔ اجلاس اچ پالیسی مسودے تے بحث وی کیتی ڳئی تے شرکاء آپݨی آپݨی تجویزاں پیش کیتیاں۔