چیف جسٹس آف پاکستان جسٹس یحییٰ آفریدی کوں برطانیہ دی معروف قانونی تنظیم “دی انر ٹیمپل” دا اعزازی بینچرمقرر کرݙتا ڳئے

اسلام آباد۔11 مئی (اے پی پی) چیف جسٹس آف پاکستان جسٹس یحییٰ آفریدی کوں برطانیہ دی تاریخی تے معروف قانونی تنظیم “دی آنرایبل سوسائٹی آف دی انر ٹیمپل” (Hon’ble Society of the Inner Temple) دا اعزازی بینچر مقرر کر ݙتا ڳئے۔ سپریم کورٹ دے شعبہ تعلقاتِ عامہ دے جاری اعلامیہ موجب، ایں حوالے نال برطانیہ دی کنگز کونسل بیرسٹر سائرہ کبیر شیخ سپریم کورٹ آف پاکستان اچ چیف جسٹس نال ملاقات کیتی تے انھاں کوں باضابطہ طور تے ایں اعزاز دے بارے ݙسایا۔ ملاقات دے دوران بیرسٹر سائرہ کبیر شیخ چیف جسٹس کوں مبارخ ݙیندے آکھیے جو اے اعزاز پاکستان تے انر ٹیمپل وچال موجود قانونی تے عدالتی رابطیں کوں مزید مستحکم کرݨ اچ مددگار ثابت تھیسی۔ ملاقات اچ صدر تے سیکرٹری سپریم کورٹ بار ایسوسی ایشن، ڈائریکٹر جنرل فیڈرل جوڈیشل اکیڈمی، ڈائریکٹر جنرل (ریفارمز) سپریم کورٹ تے سیکرٹری لاء اینڈ جسٹس کمیشن وی موجود ہن۔ ڳالھ مہاڑ اچ عدالتی تعلیم، وکلاء تے ججاں دی پیشہ ورانہ تربیت، جاری تعلیمی پروگراماں تے ادارہ جاتی تعاون دے امکانات تے تفصیلی ڳالھ مہاڑ کیتی ڳئی۔ فریقین ایں ڳالھ تے زور ݙتا جو ایجھے رابطے عدالتی نظام اچ بہترین عملی تجربیں دے تبادلے تے استعداد کار ودھاوݨ اچ اہم کردار ادا کریندن۔ چیف جسٹس انر ٹیمپل دے قانونی تعلیم دے اعلیٰ معیار تے بین الاقوامی قانونی برادری وچال رابطیں دے ودھارے اچ اوندے کرداردی تعریف کیتی ۔ انھاں آکھیے جو سپریم کورٹ آف پاکستان بین الاقوامی قانونی اداریں نال تعاون کوں مزید ودھاوݨ اچ دلچسپی رکھیندی اے، خاص طور تے تربیت، اصلاحات تے علمی تبادلے دے شعبیں اچ۔ اے ملاقات سپریم کورٹ آف پاکستان دے عالمی قانونی اداریں نال مسلسل رابطیں تے عدالتی نظام دی بہتری کیتے اوندے وسیع تر وژن دی عکاس قرار ݙتی ویندی پئی اے۔