وزیراعظم شہباز شریف دا مقامی آبادی کوں تباہی توں بچاوݨ آلے بہادر شہری لیاقت کوں خراج تحسین

اسلام آباد۔ 12 مئی (اے پی پی) وزیراعظم محمد شہباز شریف پنجاب تے خیبرپختونخوا وچال واقع علاقے جنڈ تے خوشحال گڑھ پل (کوہاٹ) دے نیڑے اپݨی جان دی قربانی ݙے تے مقامی آبادی کوں ہک وݙی تباہی توں بچاوݨ تے بہادر شہری لیاقت کوں خراج تحسین پیش کیتے۔وزیراعظم دفتردے میڈیا ونگ توں جاری بیان موجب وزیراعظم آکھیا جوہک ذمہ وار شہری دی حیثیت نال لیاقت دہشت گرد کوں روک تے اوندی سنڄاݨ پُچھی، جیں تے دہشت گرد اپݨے آپ کوں اُݙا ݙتا تے لیاقت خود وی شہادت دا رتبہ پا ڳھدا۔ وزیراعظم آکھیا شہید لیاقت دی اے لازوال قربانی ہمیشہ یاد رکھی ویسی، اوندی وقتی بہادری وݙے جانی ضیان توں بچا ڳھدے۔ وزیراعظم آکھیا شہید لیاقت غیر معمولی جرات، فرض شناسی تے حب الوطنی دی اعلیٰ مثال قائم کیتی اے، ایجھے نڈر شہری دہشت گردی دے خلاف قومی عزم دی سچی علامت ہن۔ قوم شہید لیاقت دی قربانی کوں کݙاہیں کائناں بھلسی۔ انہاں آکھیا دہشت گردی دے ناسور دے خلاف پوری قوم اپݨی سکیورٹی فورسز دے نال مونڈھے نال مونڈھا رلا تے کھڑی اے۔ وزیراعظم شہید دے درجات دی بلندی تے اہلخانہ سانڳے صبر دی دعا وی کیتی۔