وزیر اطلاعات عطا اللہ تارڑ نال “سنو نیوز” دے سی ای او دی ملاقات، ملازمین دی بحالی دا فیصلہ

اسلام آباد۔ 12 مئی (اے پی پی) وفاقی وزیر اطلاعات و نشریات عطا اللہ تارڑ نال ”سنو نیوز“ دے سی ای او ملاقات کیتی۔ ملاقات وچ میڈیا ورکرز دے حقوق، ٹی وی چینلز کوں پیش مسئلے تے کڈھئے ڳئے ملازمین دے معاملے تے تفصیلی ڳالھ مہاڑ تھئی۔ وزیراعظم دے میڈیا کوآرڈینیٹر بدر شہباز وڑائچ تے پرنسپل انفارمیشن افسر مبشر حسن وی ملاقات وچ موجود ہن۔ملاقات وچ ”سنو نیوز“ توں 114 ملازمین کوں کڈھݨ دے معاملے تے تفصیلی ڳالھ تھئی تے کڈھئے ڳئے ملازمین دے واجبات وقتی ادا کرݨ تے اتفاق کیتا ڳیا۔ ملاقات وچ ملازمین دیاں تنخواہواں وچ ٻئی کٹوتی نہ کرݨ تے مزید ملازمین کوں نہ کڈھݨ دا فیصلہ تھیا، جݙاں جو تلویں سطح دے ملازمین بشمول ڈرائیورز تے ٹیکنیکل سٹاف کوں ملازمتاں تے بحال کرݨ دا فیصلہ وی کیتا ڳیا۔ایں موقع تے وفاقی وزیر اطلاعات آکھیا ”سنو نیوز“ ولوں طے کیتے ڳئے نکات تے عملدرآمد شروع کر ݙتا ڳئے، ایں سانڳے اشتہارات دی پابندی ختم کرݙتی ڳئی اے۔ انہاں آکھیا جو کڈھئے ڳئے ٻئے ملازمین دے متبادل روزگار سانڳے ہر ممکن کوشش کیتی ویسی۔ انہاں مزید آکھیا جو صحافیاں تے میڈیا ورکرز دے حقوق دا تحفظ حکومت دی اولین ترجیح اے۔ ”آج“ نیوز دی انتظامیہ وی وزارتِ اطلاعات نال رابطہ کیتے، انہاں نال کل ملاقات تھیسی۔ وفاقی وزیر آکھیا جو جنہاں میڈیا اداریں وچ مالی یا انتظامی مسئلے ہن، انہاں دے نال رل تے معاملات حل کیتے ویسن، تے کارکناں دے حقوق دا ہر صورت تحفظ یقینی بݨایا ویسی۔