وزیراعظم دی قنون نافذ کرݨ آلے اداریں وچ کرپشن دے خلاف ‘زیرو ٹالرنس’ دی ہدایت

اسلام آباد۔ 12 مئی (اے پی پی) وزیراعظم محمد شہباز شریف قنون نافذ کرݨ آلے اداریں وچ بدعنوانی دے خلاف زیرو ٹالرنس پالیسی تے سختی نال عملدرآمد دی ہدایت کریندے آکھیے عوام دے جان و مال دے تحفظ سانڳے قنون نافذ کرݨ آلے اداریں دی صلاحیت ودھاوݨ کیتے سارے وسیلے ورتئے ویسن۔ وزیراعظم دفتر دے میڈیا ونگ توں جاری بیان موجب وزیراعظم دی صدارت وچ امن و امان دی صورتحال تے وزارتِ داخلہ دے معاملیں تے اہم اجلاس تھیا۔ وزیراعظم ہدایت کیتی قنون نافذ کرݨ آلے اداریں وچ کرپشن دے خلاف زیرو ٹالرنس پالیسی اپنائی ونڄے تے ایف آئی اے سودھے وزارتِ داخلہ دے ماتحت سارے اداریں وچ بھرتیاں خالصتاً میرٹ دی بنیاد تے یقینی بݨائیاں ونڄن۔وزیراعظم آکھیا جدید سکیورٹی چیلنجز نال نبٹݨ سانڳے اہلکاراں کوں جدید تربیت تے مہارت نال لیس کیتا ونڄے۔ انہاں قنون نافذ کرݨ آلے اداریں کوں بہترین آلات، جدید ٹیکنالوجی تے پیشہ ورانہ ساز و سامان ݙیوݨ یقینی بݨاوݨ دی ہدایت وی کیتی۔ اجلاس وچ ݙسایا ڳیا اسلام آباد وچ زیرِ تعمیر جیل ایں سال ستمبر تئیں فعال تھی ویسی۔ وزیرِ داخلہ اجلاس کوں ایف آئی اے، اسلام آباد پولیس، این سی سی آئی اے، فیڈرل کانسٹیبلری، سی ڈی اے تے ٻئے اداریں دی کارکردگی تے مستقبل دے منصوبیں بارے بریفنگ ݙتی۔ اجلاس وچ نائب وزیراعظم اسحاق ڈار، وفاقی وزراء محسن نقوی، احسن اقبال، محمد اورنگزیب، وزیرِ مملکت طلال چوہدری تے اداریں دے سربراہان شریک تھئے۔